SCHOLARSHIP

Tunlai chu College zirlaite tan scholarship sem a ni ve dawn tawh a, a lawmawm ngawt mai. Scholarship hmuh avanga lehkhabu lei thei leh admission titheite tan phei chuan lawm hliah hliahna tur a ni.

Scholarship sem dawn hi chuan thil pakhat hi ka hrechhuak ṭhin a. Kan kalna hmasaa Student Union-in fine an tar chhuaha ka hming lang miah si lo, Principal office aṭanga rawn chhuak thar leha ka fine Rs. 100 rawn ni ta dawrh kha. Student Union hruaitute ka han hrilh lah chuan, "Principal office aṭanga rawn chhuak hi a dang leh tawh a" an lo ti a. Principal hnena ka han sawi lah chuan "Kha kha thu tawp a nih kha" min tihsan mai si.

Keini college function nuam tia thulh ngai mang lo tan chuan Scholarship sem nia Rs. 100 han fine ngawt kha uiawm ve duh tak a ni. Room aṭanga chhuah ve leh eng pawl hrang hrang emawin khami ni denchhen khan thawhlawm emaw inhlawhna atan thil an lo zuar leh ṭhin bawk a. Thawh loh theih loh, lei loh theih loh kha a ni ṭhin.

A tira fine tur reng pawh ka la ni lo leh nghal a. Chu ai maha mak ka tih chu Principal office aṭanga fine rawn inziak belh ta kha a ni.

Student Union hruaitute sawi ang khan a tak tak lo ni ta se la chuan pulpit-ah thute a sawi dur dur ṭhin si a, ka rin loh zawng tak a ni ang!

Sawi tumah lut tawh ila. Scholarship chungchangah hian ṭhenkhat hi chuan kan tidik lo deuhin ka lo hre ṭhin. Ti-ṭha, sikul kan kal laia kan ṭhianpa leh a pa chanchin an sawi kha ka theihnghilh ngai lo. A pa chu Sorkar officer lian pawl tak a ni a, dikna ngaisang tak a ni. Ṭhian dangten an han dil a, sem chhuah nia an han dawn sup sup chuan dawng ve lo nih chu a nuam bik ṭhin si lo a, a han dil ve chhin a, dawt sawi hauh loin a pa sum lakluh zat dik takin a ziak a, a dawng khat khawp mai! A pa pawhin dik taka ziak turin a ti ṭhin an ti.

An chhungkua Pathianin mal a sawm a, amah pawh tluang takin a la zir a, a u phei chu hmannia officer lian an lak zingah khan a tel nghe nghe. Chhungkaw kawm nuam tak leh hawihhawm tak an ni. Min zirtirtu pakhatin, lehkha a zir chhung zawnga dawt sawi (scholarship dila dawt sawi) ngai loa a zir chhuah theih avanga a inchhuan thu a sawi ka la hre reng ṭhin bawk. Ani pawh kha chhuanawm tak a ni. Kawng zawhtu tam tak zingah khan eng zat nge thu dik sawi ang aw te ka lo ti ve mai mai a. Mahse kan dikna chanvo hum tura buaina siam loa kawng kan zawh thei erawh a lawmawm ka ti.

Tam tak, fel tak tak leh rinawm tak kan awm laiin mi ṭhahnem fe hi chu he lam kawngah hi chuan kan che fel lo deuh ṭhin a ang. Nu leh pa Sorkar hnathawk reng, mah se scholarship hmuh hmaih ngai si lo hi kan van tam em! Chutiang bawkin sumdawng hausa leh sum hai lut hnem em em fate pawh kan bang chuang lo. Hlawh hnem tak, kohhrana rawngbawltu ni tho si fate chenin kan han dil tlang mai ṭhin hi chu a zia lo deuh hret a ni. Tribal nih vanga la turah kan inngai ngawt nge chu ka hre law. Kan lak luh zatah dawt kan sawi avang la thei ta hi kan tam a ni. Fate pawl zat a la hniam deuh lai chuan dil loh tur tia sawiho te pawh an fate zirna a rawn sang chho a, a hautak hnuah chuan dil loh an ngam bik chuang lo! Hetiang teh nuai kan nih avang hian kawng dik zawh a harsa khawp mai.

Engtin nge kan siam ṭhat theih tak ang? Pathian mi hriat nia kan ngaih nu leh pa tam tak hi he mi kawngah hian zuk fihlim lo ve ṭhin tho a maw le! Ṭhenkhat hi chuan a dik lo a ni tih pawh an hre thiam lote pawh a ni mahna. Chhungkuaa inzirtir kan ngai tak zet a ni ang, a khawtlang huap pawhin.

Tin, zirlai zingah pawh kan sum dawn te hmang thiam lo kan tam mai. Bazarna tur, incheina leina tur leh thil eng eng emaw tihna tur emaw ti tlat kan awm. Pawisa hmuh ni chuan bazarah kan tei suau suau a. 'Uniform' hak ni phei chuan sikul naupang phei chu kan langsar duh bik leh zual. Govt. Mizo High School leh Higher (Chanmari, Aizawl) a kan kal laite khan, scholarship sem ni hi chuan bazarah kamis var leh kekawr/ pawnfen dum inbel kha kan phe suau suau zel kha a nia! Tunah chuan pawl 12 zo tawh, puitling anga ngaih kan nih tawh avangin sum hman kawngah pawh puitlin i zir zel ang u. Zirlaibu emaw finna leh hriatna kan chhar theihna tur lehkhabu lei nante hmang ila. Kan zirlai kaihhnawih thilah i hmang zawk teh ang u. Cell phone thar leina tur emaw kan ti tlat hi a ho ka ti em em bawk!

Mamawhna eng eng emaw hmanna tur pawimawh hi chu a awm lo thei lo a, chutiang pawh ni loa a zavai maia kan zirna kaihhnawih miah loa kan han hmang ṭhin hi chu, ti lo tura kan inzirtir a ṭha e ka lo ti ve mai mai a. Dawn kim loh kan duh lo a kawng kan zawh ta sa sa, dik takin i hmang ang u aw.

Thu dang, inkaihhnawih tho si, scholarship dilnaah mahni bank account number te kan han theh lut sap sap a. Mahse Mizorm Scholar-ship Board hotute chuan, "Account-a lut lo emaw, dawng lo emaw an awm chuan account dik lo emaw, account number theh lut lo an ni ang" an ti a (Vanglani Feb. 6.2015 chhuakah). Keini college chu form hnungah bank account xerox sain kan dah thlap a. Lo dawng lo palh emaw, kan dawn tur ni lo mi dang account a lut lo awm ta thut se la keini thiam loh a nih ka ring tawh lo a. Tu emawin a lo 'enter' sual palh thei, office lama computer hna lam thawktu emaw pawh an ni thei.

Zirlaite mawhchhiat ngawt kha a tir aṭang insawi thiam an tum nghal a ang ka ti deuh. Tihian ka vei zawng hi ka han tlangaupui ve leh lawk a ni e.