Sikul ṭan hma bawk!
Tun hnaiah kan sawrkar hruaitute ṭhu khawmin zirna sikul kalphung an tidanglam hlek a, zing dar 9-a ṭan ṭhin kha dar 8-ah te ṭan a nih tawh dawn. He mi chungchangah hian Zoram mipuite ngaihdan a inang lo hlawm hle mai a. Ṭan hma ṭha ti pawl leh a ṭha lo ti pawl an awm a ni.
Ram hruaitute berin kan tana ṭha tur zawk a nih beiseiin an han tidanglam a, enga mah hmaa lo sawisel nghal chiam hi a dik ber em? A ṭhatna tur emaw, a ṭhat lohna tur emaw hre tur pawhin tuman kan la chhin lo a; chu lai kara lo buai nghal vak chu a dik dawn em ni? Buana hmaa kherh te chu!
'Zing thawh hma a ngai dawn lutuk... tlaiah kan fate enkawltu nei loin an awm rei dawn’ tih vel a ni - a nuihzat thlakin a zahthlak ka ti deuh tlat! Engah nge maw zing thawh hma chu kan huphurh viau ni? Hriselna atan pawh a ṭhat tehlul nen. Keini, mahni thua zing thawh nachang pawh hre mang lote phei hi chu, tihluihna hmanga min nâwr tho tuk tintu hi awm se ka lo ti viau mai asin! Fate sikul ṭan hma dawn avanga a ram puma kan han tho hma tur ka ngaihtuah hian kan changkang thar dawn riauin ka inhria!
Vak zau deuhten hmun danga sikul an ṭan hmazia an sawi tawh ṭhin. Ni a chhuah aṭanga darkar 1 vel lekahte sikul an ṭan a, keini erawh ni a chhuah aṭanga darkar 3 hnu velahte sikul kan ṭan a. Hnam dang nuho mahin an fate sikul kal tur an peih hman chuan, eng vangin nge Mizo nuho hian an peih hman loh bik lem ang ni? Pawl lian leh chak tak MHIP pawh an din thei alawm!
A thuhrimin Mizote hi a hnam anga zing tho tlai kan ni ngai lo. Tun hnai, engemaw aṭang khan kan tho tlai ta; changkannain min bawhbeh aṭangin! Thawhtlai hi Mizote nunphung a ni lo hrim hrim. Tunhma chuan varṭianah kan tho a, tui chawi, buh den, bal den leh eng-i-lo kan tih zawh vek hnuah hma takah feh turin kan chhuak hman.
Keini, ei leh in ṭha hmu zawk, hna rum thawk tlem zawkina zing thawh hma kan peih lo ta mai hi chu changkanna changkang lo tak a ni! Zanah ni se, TV en leh eng emaw mai mai bauipuiin kan meng vak vak a, ṭul lovah kan hun sen kan ui loh laiin, a ṭul zawka insen kan peih lo tlat si hi chu a dik lo hulhual.
Hmasawn ngam lo nun hi Pathian duhzawng a ni lo. Kum tam tak dam turin hna thawk la, naktuka thih turin ṭawngṭai rawh, a ti. Thawh tam hlau ni awm ziazanga zing thawh hma huphur tlat hi ram hmangaih zia a ni lo! Kan Pathian thu vekin, ‘Mut thlahlel suh, i lo pachhe dah ange,’ a ti. Fanaute hi Lalpa laka kan rochan an ni, ti reng siin midang enkawl ṭhattir kan tum tlat nite pawn a lang. Hei hi Kristian ze dik a ni thei lo!
Kan fate chauh hi kan kuta awm an ni a, an awm dan chenin ka chhui zui peih tur a ni. Kan duh loh dana an awm a nih chuan, kan zilh tur a ni! Bible chuan, ‘I fa chu vaw rawh, a thi dawn si lova!’ a ti. Kan fate hi tute emaw rawn kalin min enkawl sak tur a ni lo. A sual duh leh tum tan chuan tuna kan kalphungah pawh hian humsual daina hun a tam lutuk.
Mahni intihlum kan tam tak em em chhante pawh hi, rilru kan kawm hman lutuk vang leh hunawl kan ngah tak lutuk vangte pawh a ni ang! Chuvang chuan rilru sawrbing hman lo lek hian han buai map map phawt ila, a ṭha zawk mial mahna. Khawvel kalphung mila inher rem zung zung thei tura khuanu duan kan ni tih inhre reng ang u. Mizo kan nia lawm, engnge kan theih loh bik lem ang le!
Naupang chuan an tlin mai ang a, zirtirtute zawk hian an tlin lo anga kan zirnain a chhiat phah ang, kan la ti fo em? Khawvela hna ropui ber leh zahawm ber pawl, zirtirtu hna thawk thei khawpa mi ropuite hi chuti mai an nih ka ring lo. Kan hnam ṭhahna tur chuan theihtawp an chhuah zawk ngei ang.