Ṭhalai hian ṭhatna an nei ve a nia!

Tunlai chu Mizo ṭhalaite selna lam kan hmu ṭhin a, an ṭhatna lam hi sawi tam a ṭha zawk lo maw? Scholarship phûta au rualte vangin ṭhalaite selna kan hmu nual a, Mizo ṭhalaite hmasawn dan hi thui vak lo chu tarlan kan tum dawn a ni.

Zuk leh hmuam kawngah hian Mizo ṭhalaite hi an fel tawh khawp mai. Tun hma anga ha bâl tak tak, ka chhung sen huam kha hmuh tur an tlem tawlh tawlh. Ṭhalai zuk leh hmuama fihlim, kuhva takngial pawh ei duh tawh lo hi an pung zel a ni. Drug addict leh zu ngawl vei lam hi an sawi uar ṭhina heng lamte pawh hi sawi uar ve chu a ṭh a ni.

Lehkha thiam lamah phei chuan Mizo ṭhalaite hi an fel tawh hle a ni. Central service-a lut an tlem tawh vang hian kan tlahniam taah kei chuan ka ngai ve lo a, kawng dang zawh tur a tam tak avangin tun hma angin competitive exams lamah an in sawrbing vek tawh lo zawkah ka ngai. Kan lehkhathiam ber berte hian IAS nih kher an tum tawh lo a, line ṭha dang, hlawh leh hamṭhatna ṭha keng tel a awm tawh avangin an kalkawng a dang ta deuh maiah ka ngai. Kan doctor thiam chinte thiam tawhzia, kan engineer-te hmasawnzia leh architect kan neih ṭhat tawhziate pawh hi sawi ve ta zel ila a ṭha ang.

Sports leh music-te thlengin hma­sawnna hmuh tur kan hmu zel a, tun hmaa an thlen phak ngai loh kha an thleng chho ve zel. Hengte pawh hi hmasawnna chi khat a ni a, kan hmuh hmaih tur a ni bik lo ang. Hei mai hi a ni lo, eizawnna kawngah pawh ṭhalai hnathawh hreh nei lo hi ṭhahnem tak an awm.

Hnathawh nachang hre lote an awm rual hian, hnathawh tur zawnga India ram ril leh ram pawn thlenga chhuah dan ngaihtuah ngar ngar maite hi kan nei nual a, inhlawhna hrang hrang hi an zawng sup sup tawh a ni.