Zirlaite tan 'Dikna chanvo leh mawhphurhna'

Tun hnai maiah MSU huaihawtin 'Zirlai chanvo rah­beh duh lohna kawng zawh' neih a ni a, zirlai sang nga chuang pungkhawmin an dikna chanvo humhim a, sorkar aṭanga an chanvo dawn phutin kawng an zawh a, an tih tur reng an ti a ni.

Chutihrual chuan zirlai pungkhawmte khan he ram leh hnam tan hian an mawh­phurhna an hlen ang em? tih hi zawhna pawimawh tak a ni. Mahni chanvo hum­him kan duh ang zat chiah hian kan mawhphurhna pawh hi hlen tlang ila a ṭha hle awm e.

Zirlai sangnga rual pungkhawm khan he ram leh hnam hian chhung lam leh pawn lamah faina leh thianghlimna a neih theihna turin ke pen se la, chu chu an mawhphurhna an ko a tla a ni. Dikna leh rinawmna chawinun leh chawisan kawngah pawh ke an pen a ngai a, chu chu an mawhphurhna liau liau a ni bawk.

Mitin mai hian he ram leh hnam tana kan mawhphurhna neih ṭheuhte hi tih hlawh­tlin tumin ke pen tlang i la, a bik takin vawiina kan zirlaite hian. Zirlai pawl lian tak pahnih MSU leh MZP te pawh hian zirlaite chanvo humhim an duha hma an lak ang chiah hian an mawhphurhna hrilh hriat kawngah hma nasa takin la se a ṭha hle awm e.

Zirlai sang nga rual kalkhawmte khan au rualna neiin kan CM zahawm tak pawh nasa takin an au khum a nih kha. Zirlaite khan kan CM hi an zah lo nge kan CM hi a zahawm tawk lo? tih pawh hi zawhna pawimawh tak a ni awm e.

Mi ṭhenkhat chuan khatianga an au rual avang khan Zonunmawi an tibawrhbang ang hialin an sawi a, dik ti an awm ang a, a awm viau ti pawh an awm ang. Engpawhnise khatianga au khum ngai lo khan kan thuneitu lamte pawh hian an mawhphurhna awm sa hi hlen ve mai se a ṭha hle ang. Zirlaite pawhin Zonun­mawi chawisan leh chawinun kawngah hma nasa taka lak thar nan hmang se, kan zirlai hruaitute pawhin chutiang rilru an put sa chu nasa zawkin lan chhuahtir se a ṭha hle ang.

Zirlaite hian chan­vo kan nei, chu chu engtik hunah pawh a humlalh nan hma kan la ang, chumi rual chuan chutiang zat chiah chuan kan mawhphurhna hi kan hlen ṭheuh tur a ni. Zirlai pawlte khan zirlaite chanvo humhimna turin an mawhphurhna an hlen a, sorkar pawhin a hlen chho mek bawk.

A tawp berah chuan he issue aṭang hian zir tur kan nei a, sorkarin zir tur a nei a, zirlai pawlte pawhin an nei bawk a, ka ngaih pawimawh ber zirlaite hian mawhphurhna hlen hi zir chhuak se ṭha ka ti hle mai.