Sumo counter sawn harsatna
Kan roreltuten 1.3.2015 aṭanga Sumo Counter Aizawl pawn lama sawn tur an tih hi keini zokhuaa mirethei leh harsa zawkte tan chuan a hautakin a huphurhawm tak meuh mai.
Hetiang zel a nih chuan kan taxi stand pawh hi Aizawl pawn lamah dah kan la tum mai ang tih pawh a rinawm rum rum ta mai.
Entirnan - Aizawl to Buarpui sumo fare chu Rs. 300/- a ni a. Tunah hian kan counter hi Aizawl laili Millennium Centre opposite-ah a awm a. Khawi hmun aṭang pawhin passenger-te tan pan a remchang vek a ni.
Chhim lam zawng chu Ngaizelah sawn tur a tih a ni ta a. Passenger 80% hian Ngaizel bul velah thlenna kan nei lo. Zemabawk, Durtlang leh veng dang aṭanga Ngaizel pan nan ringawt hian Rs. 150 - 250 a lo ngai a, Aizawlah chaw ei man Rs. 130/- nen Rs. 430/- chawia kal ṭhin khan Rs. 680/- chawi zel a ngai dawn ta a ni.
Hetiang vek hian Mizoram hmun tinah thil a thleng mek a ni.
Aizawl pa tam berte hi chuan thingtlang mite harsatna hi in hre phak lo tak tak a nih hmel khawp mai. Ṭhenkhat sawi tlangkama kan lo hriat dan phei chuan ruahmanna an siam lai hian thingtlang kan ngaihtuah pha lo an ti tihte a ni. Kan hotute hian thingtlang mirethei, puk chawpa damlohna leh loh theih lohna avanga Aizawl lo kal ngai ṭhinte hi min ngaihtuah nawn leh teh u.
Zing dar 6 a chhuak fel vek turin Sumo-ah kan inpeih hman vek a, hetianga kan inpeih hman chuan traffic tawt lutuk leh buaina em em tur dang a awm lo. Zan lam pawh hetiang tho hi a ni ang. Kan Chief Minister zahawm tak hian miretheite kan VIP an ni a ti ṭhin a, a thu sawi hi tunah pawh a la ngai reng thoin ka ring.
Thuneitute hma chak taka min laksak turin thingtlang mi harsa zawkten kan ngen tak meuh meuh che u a ni.