Mifing phunchiar

Tlem lai deuh khan ṭhalai ram vei intelkhawm kan hmu a, kha mite khan ram hruaitu awm saa an lungawi lohna leh thil ṭha zawk an duh thu an sawi a, mifing leh mithiamte an nih vangin an thusawite khan nghawng a nei ngeiin ka ring tlat a ni.

Tunlai hian ṭhalai ram vei tak tak, Facebook leh thil dang kaltlanga ram an veizia tarlang ṭhin an awm niin ka hmu ṭhin a, ka rilru chhungril hi a lawm a, ṭhalaiin ram an vei hi chuan a sawtin ka hre khawp mai. Keia hmuh danah hi chuan, Ṭhalai thil thlir zau zawkin ram hruaitu an duh khawp lohna an han sawi a, a hre thui deuhte phei chuan a siam ṭhat dan turte an han kawhhmuh thiam zui bawk si a, Mizoram future hi a bright khawpin ka hria.

He thu hi titinaah ka sawi chhuak tawh a, kan zinga mi pakhat chuan, "Mifing ṭhahnemngai chu an ṭangkai a, mifing phunchiar hi chu an ninawm, ṭhalaite rilru an ti negative zawk a ni," a ti a, tu tu hming emaw a sawi a, ziaktu lar tak tak tun hma deuha sawiselna lam ringawt ziak ṭhinte a sawi a. Journalist ṭhenkhat awm dante a sawi a, a ngaihnawmin ngaihtuah chu a tithui khawp a, mah se ka rilru te te chuan mifing ngawi reng ai chuan mifing phunchiar hi ramin a la sawtpui zawk thoin ka ring.

Mi ṭhenkhat hi chu phunchiar ve hrim hrim, siamṭhat duhna rilru lam pu lova tute emaw beih hrim hrim chak, a chhe lam hlir mai sawi chhuak, mi khei nei rana thil kalpui ching hi an awm a, Facebook-ah hian chutiang mi chu an awm nual ang ka ring. Mi ṭhenkhat hi siamṭhat duhna rilru pu chunga rawtna siam ṭhin, Mizoram hmasawnna duh tak tak vanga an ngaihtuahna ziak chhuak ṭhinte an awm a, heng mi inang lote hi an thuziak kalhmangah hian a hriat hran theihin ka hria.

Sawiseltu ṭheuh ṭheuh hi siam ṭhat duhtu leh er neih vanga sawisel hi chu a dang leh daihin ka hria, hengte hi tun hnaia chanchinbua thuziak ka chhiar leh internet khawvela ka thil chhiara ka hmuh ṭhin chu a ni.

Thil pakhat ka han sawi leh duh chu internet kaltlang thil hi Mizo zingah a la thawk na vak loin ka hria, tih hi a ni. MLA inthlan dawn khan Facebook aṭanga sorkar tur kha chu a chiang mai a, a takah MLA an nei miah lo a, chuvangin internet vela lo râk vak vak hi chuan Mizo mipui nawlpui hi a la nghawng phak lo tih hi ka han sawi tel duh chu a ni. Chuti chung chung chuan ṭhalai mithiamten an ngaihdan an ziah chhuah hi facebook khawih chin hi chuan kan ngaihtuah chhunzawm ṭhin a, ziak uar sauh sauh turin ka duh a ni. Mifing phunchiarna hi chuan nghawng ṭha tak a neiin kei chuan ka hria a ni.