Officer-te thawhpui thiam a pawimawh

Sorkar ṭha, sorkar chak, mipuite ngheng sorkar leh hmasawnna ruahmanna ṭha sorkar nei tura pawimawh hmasa ber chu officer-te nena thawhhona ṭha neih a, thawhpui thiama hman thiam a ni thei ang. Minister chuan a officer-te inpawh takin ruahmanna a siampui a ngai a, phûr leh thatho taka an thawh theih nan a kîlkawi a ngai ṭhin.

Officer-te ruahmanna siampui a, anni'n chak taka hna an thawh avanga khawpui danglamna leh hmasawnna chhinchhiah tlak lo thleng tawhte tlem thai lang the ang.

Mobile garbage trailer

Ka hriat chian, ka hun laia thleng a ni a, ziah loh theih a ni lo! Mi tam takin kan la mitthla theih tur chu Aizawl khawpui laili taka mobile garbage trailer awm ṭṭhin kha a ni awm e. Bawlhhlawh paihna hnuh chi kha khawpui laili takah kan hûng fer fur a, bawlhhlawh a vûm thêr thûr a; khualzin leh mipui veivâk tana hrehawm khawpin a rimchhia a ni.

Ṭhenkhat chuan Treasury Square-a awmte kha in la mitthla theiin a rinawm. Bawlhhlawh kha a liam deuh pûr a, kawng kal tana hrehawm tak, khawpui laili tiṭawptu a nih kha.

Minister ka nih ve lai khan khatih laia UDPA Director Pu P Lalchhuanga te nen meeting kan nei a, ngaihtuahna thar neih a ngaihzia ka sawipui a. Hun rei lo te chhungin tuna kan hman tak zel bawlhhlawh paih dan 'system' ṭha tak mai Public Private Partnership Mode (PPP Mode) hi duan chhuah a ni a. Mipuiin pawisa thawh vein, sorkar nena ṭangkawpin veng pali - Mission Veng, Tuikual South, Dawrpui leh Chanmari-te nen bul ṭan a ni ta a; veng dang pawhah chhunzawm a ni ta zel a ni.

Khatih lai kha chuan zing karah traffic jam siam lovin kan zo vek a, tuna chhunahte bawhhlawh paih motor an tlan ta zel hi chu siamṭhat ngai tak niin a lang. Kan luikawrte a lo fai a, mipui kan awlsam phah bawk.

Oxidation pond

Aizawlah septic tank siam dan a fuh tawk lo nge ni, ek paih motor a tam em em a, lui kawrahte an paih a, a fuh lo ṭhin hle a nih kha. Kha harsatna kha harsatna mai a ni lo a, khawpuia chengte hriselna atan pawh thil ṭha lo tak a tling awm asin!

UDPA leh PHE department officer-te meeting ka neihpui vat a, Er. Helen Rodingliani, PHED chuan Germany-ah he harsatna sutkian dan leh sawngbawl dan Oxidation Pond an siam thu a sawi a. Ek paihna mai bakah, leiṭha siamna a ni tel tihte hriat a ni bawk. Hemi ti thei tur hian PHED leh UDPA officer-t’en project rang takin an rawn duang a, thla khatah an duang zo. Ek paih motor a bo zo ta ni mai lovin, a ṭhen chuan leiṭha sumdawnna atan an hmang ta hial. Pu F. Lalnienga, Republic Veng leh mimal ṭhenkhatin he leiṭha hi sumdawnna atan an hmang ta.

Road signage

Ram changkang zawkah chuan khawpui chhungah kan kal duhna kawhhmuhtu a hringa tar road signage board kan hmu ṭhin. Hetiang hi kan mamawh ve tawh a, UDPA officer-te nen kan sawiho a, thla hnih chhung lekin project peih vek a ni.

Pu Sangmama, Government Secretary leh UDPA Directorate engineer-te hmalak nghalna hi a fakawm a, a phunna tur veng hming engkim an ruahman nghal zung zung a. Hun rei lo te chhungin road signage board chu kan khawpui Aizawl, Champhai, Lunglei leh Kolasib-ahte kan nei ta mai a ni.

GAWSS Phase-III

Aizawl khawpui tui lak pakhatna leh pahnihna, Greater Aizawl Water Supply Scheme Phase I & II-te hi ṭha mar reng mah se, khawpui a châwm zo tawh lo a ni ber a. Ni khata a tui pump theih tam zat chu litre maktaduai 27 (27 MLD)-te a ni deuh mai si a. Hei vang hian a pahnih inbelhkhawm aia lian 37 MLD, Phase-III ruahmanna neih ngei a ṭul tih a lang reng tawh.

State Investment Project Management and Implementation Unit (SIPMIU) officer Er. Valbuanga te nen meeting neiin ngaihtuah a ni a. Asian Development Bank (ADB) aṭangin state tinin kan dawn first phase kan dawn chu kan engineer-te’n a hunah an zo a, state dangte erawhin an zo thei lo thung. Hei vang hian ADB lamin state dang hnena 'Commitment' a pek tawhte chu kan thawh ṭhat avangin kan hmuh phah ta a, Aizawl tui lak pathumna GAWSS Phase-III kan neih theih phah ta hlauh a ni. ADB loan-ah hian Mizoram sum pakhat mah a sen a ngai lo.

Tlangkawmna

Minister ka nih ve kum 10 chhunga officer-te nena kan thawhhona hi rawn thlûr bik ka nihna chhan chu ka hriat chian leh bel ber a nih vang a ni. Officer hming ka rawn lam rîkte phênah hian officer dang ṭhahnem tak an awm. Mizorama kan officer-te hi India state dang officer-te nena khaikhinin an nêp lo; an nêp lo mai ni lovin, an ṭha a, an thiam bawk. Sports & Youth Services leh MSSC officer-te pawh sawi tur tam tak a awm a ni.

Kan officer-te hian thil ṭha leh thil thar, ruahmanna ṭha leh hmasawnna neih an duh. Mahse la, sorkarna chelhtu minister-te berin kan tih thiam a ngai tih hi sawi lan ve hrim hrim ka duh a ni.

- Zodintluanga Ralte, Ex-Minister