Hnam dang lirthei tam ta lutuk hi

Kumin kum tir mai aṭang khan Aizawl khawpuiah hnam dang (vai ho) lirthei khalh leh tlan tam ta lutuk hi a veiawm a, nakin atana min chimralna tur hmahruaitu a nih a rinawm. Heng lirthei hian eng nge an phurh a, eng sumdawnna nge an kalpui tih hriat a harsa bawk si. Two wheeler-te hi an hminga registration ti nge an nih an sumdawnpuite hming tih pawh enfiah a ngai ta hle mai.

Hman deuh lawk khan Vairengte aṭang zanah kan haw a, lirthei, a bikin Assam registration car kan tawk hnem em em mai a, kan chhiar a, 80 zet kan tawk a ni. Heng ho hian ILP an nei ang em? An lirtheiah eng nge an rawn phurh luh a, eng nge an phurh let leh tih pawh kan hre hauh lo. Eng emaw tak chu an rawn ti tih a chiang. Sumdawn phalna nei hauh loin a rukin an rawn sumdawng a nih a rinawm riau asin.

Chung vaiho lo zin chhote hian Mizo, a hmei a pain an thurualpui ngei a rinawm a, a bik takin hmeichhia an ni duh tlangpui. Thurualpui nei loin heti zat zat car nena lo kalna tur chhan a awm a rinawm loh. Khualpâng zin (tourist)-te chu an rawn zin a, nuam an tihna laiah an kal a, an haw leh mai ṭhin. Mahse, tourist satliah an ni vek lo tih hriat a ṭha khawp mai.

Tun hnaiah Manipur a buai a, Myanmar aṭangin ruihhlo pawh Mizoram kaltlang a tam ta hle. Excise emaw, YMA emaw leh force dangte'n an man hnem theih dan aṭang hian Mizoram kaltlanga phurh ruihhlote a tam hle tih kan hre ṭheuh. Chung ruihhlote chu heti zat zat hnam dang (vai) car hian an phurh a rinawm tlat.

Vairengte Police checkgate leh Excise checkgate khu tihchak an ngai ta hle tih a lang. Duty an tam ṭhin si lo a, motor zawng zawng check turin man-power-in a daih seng lo. En liam deuh mai mai chang an ngah ngawt ang. Tin, duty ho pawh an in thlahdah ve deuh bawk. A bikin Police checkgate khu pawisa an lak ṭhin tihtawp a nih aṭang khan an dul hle tih ka zu hmu ve tawh. An hotute hian enfiah deuh se a ṭha ngawt ang.

Assam-ah private car-a kan luh dawn chuan Assam police-te'n uluk takin min lo check ṭhin a, ruihhlo phurh palh phei chu a hlauhawm ngawt ang. Chutiang chuan Vairengte Police checkgate-ah khuan police ṭha deuh dah belh theih ni se, an lut leh chhuak uluk zawkin endik se a ṭha ngawt mai.

Hman deuh khan Pi Vanramchhuangi'n vai velh hnatlang neih a rawt kha chi leh chi, hnam leh hnam inbeihnaah ngaihsak lo ila, hnam dang an huangtau ta lutuk a ngaihmawhna a ni a, a thlawpawm viau mai. Mahse, fimkhur erawh a ṭul khawp ang.

- Lal Rinmawia