Sawhthing Grade ‘A’

Tunlaia mi tin ngaihven leh sawi hlawh ber pakhat chu Dt 26.6.2024-a Dr KC Lalmalsawmzauva, Assistant Professor, MZU, Kalphung thar sawrkar-a Adviser to Chief Minister (Handholding Policy) chuan sawhthing grade ‘A’ manah Rs 50 chu support price atan bithliah a nih tawh bakah, sawrkar pawhin a buaipui tur thu a sawi laiin, grade ‘B’ ho erawh society leh a leitu turte kuta a awm tur thu a sawi hi a ni. Hemi ṭuma awm Agriculture Minister thusawi aṭangin agriculture marketing system mumal tak kal chhohpui an tum thu leh aieng, hmarcha, hmunphiah leh sawhthing hoah support price siam a nih tur thu hriat a ni a, beiseina a sang hle a ni.

Sawhthing hi kan hriat angin kan ramah hian a ṭha duhin a thar lah kan thar tam viau ṭhin a. Kan hralh ṭhat kum chuan kan lawm em em a, nimahsela, a hralhna a awm loh vek vek chuan cho lovin kum 2/3 thlenga han dah mai/leia phum chang kan nei ṭhin. A hralhna lam bakah, tâm thei a nih vang hian sawhthing chin hi risk a sang em em mai a. Amaherawhchu, mi nawlpuiin kan chin theih a nih bakah tih fuh kuma kân awkna tham a ken tel vang hian kum tin hian sawhthing chingtu kan ṭhahnem viau ṭhin. Kan politics-ah pawh hmun pawimawh tak a luah pha a ni. A bik takin tuna kalphung thar sawrkar hian sawhthing hi an auhla bera an hman a ni bawk a, sawrkarna an han chelh ta bawk nen, sawhthing hi Mizoramah kut hnathawktute’n an ling nasa leh zual a ni.

Awle, support price hi grade ‘A’ tan chauha sawrkarin dah/cover a han tum hi kawng ṭhenkhatah ṭhatna a awm theih rualin, a felhlelin an hmanhmawh lulai deuhin a hriat. Sawhthing chingtu hi an pung nasa a, an chinna leilung pawh a inang lo nasa hlawm dawn a. Tuna hetia grade ‘A’ chauh buaipui chhoh tumna boruak hian kut hnathawktuteah rilru hahna leh buaina nasa tak a thlen thei a ni. Risk nasa tak hnuaia hma la an ni tih theihnghilh loh a ṭha.

Chutiang zelin grade ‘B’ leh a dangte chu hlamchhiahin support price hian a tuam/cover dawn lo an ti leh nghal; a buai chho tulh tulh mai. Support price kalpuina tura budget-a dah fel vek tawh hian grade ‘A’ chauh lo, a ṭul dan azira grade ‘C’ thleng a awm a nih pawhin tuam/cover tir mai rawh se. Kalphung thar sawrkar hi grade ‘A’ voter chauhte vote vanga tling an ni bik lo.

Sawhthing grade ‘A’ bik tana support price Rs 50 per 1 kg a bithliah a ni pawh hi tunlai sum hlutna tlahniam mek zel enin a hniam/tlawm mah mah a ni; a chi man pawh a to chhoh tawh a, a vang phian leh nghal a. Chuvangin, grade ‘A’ manah hian a lo berah Rs 70-80 tal ni rawh se. Sawrkar hian vanneihthlak takin sawrkar liam taa SEDP sum sem hman loh ṭhahnem tak kha an rochun a, sum pawh an nei viau tur a ni. Hetia sawhthing mana Rs 50/1kg chauh theh chhuah an tum thu han hriat hian ngaihtuahna a tithui khawp mai. Tunlai chhoah Rs 50 hi chuan grade ‘A’ chin ngat phei chu vaihovin an lei ngam sa hmel a ni. Support price-a man hniam tak siam hian a hlut tur angin a hlu lo thei tlat, a chingtute aia a leitu lam ngaih pawimawhna a lang lian zawk sa lur mai.

Han ngaihtuah thui deuh phei chuan hmunphiah chungchanga an hmalak dante enin sawhthinga support price kalpui an tum dan hi a hlamzuih mai ang tih a hlauhawm. Chuvangin, hnawhsarum taka kalpui ai chuan regulated market-te din a, a ṭul anga kut hnathawktute hnena agriculture marketing system lama inzirtirna (awareness campaign) neih phawtte a ṭha zawk awm e.

Mi rinawm lo tlemte vanga kut hnathawktute zawng zawng hmer tel a, mi rinawm lo ang hrima kan hotute’n an sawi pawh kha thil âwm lo tak a ni. A sang/sing/nuai bi chinah chuan mi han fel zan lo deuhte chu an awm ngei ang, mahse, Mizoram ei leh bar mamawh thar chhuak thei tur khawp kut hnathawktu rinawm tam tak an la awm a ni.

- Zion Lalremruata, 7005188684