Ka fanu chu a kût ve lo ang

Mizorama a huhoa zurui pun khawm tamna ber anga an sawi, Police hmuhlai renga zu in theihna hunpui leh khaw êng leh Mizo mipui pungkhawm pawh zah lova an lo infawh ngawng ngawngna hmun, Chapchar Kût lawmna Lammualah hian ka fanu hi chu a kal ve ka phal lo ang, tiin bul ka han ṭan phawt dawn a ni. Kan sawi tum hi in rin aiin a chiang fek fawkin a den a na dawn a, a hua hua chu nangmahni kha in ni mai.

Chapchar Kut buatsaihtu lam hian zu ruih an phal em ni? Kan Police-te khan zu rui duhtawka tal kha an phal em ni? "Kût alawm," tiin an ngaidamin an ngaizam zel dawn a nih chuan, "Krismas alawm," tiin krismas laia rui hi ngaidam ve se, "Concert a nia... inkhel enna a nia... inneihna a nia... birthday lawmna a nia," tia ngaihdam zel tur chi a ni dawn em ni? Lammual chu zu hmunah kan chhuah a ni ber mai. Zu rui lo tam tak an awm tih ka hmu a, ka ngaihmawh chu zu rui ve lote tana nuam lo khawpin rui an tam.

Fanu nei ka nih anga ka sawi duh chu kan fate rual lek lek, Sunday School lama Intermediate rual lek ni si nu leh pa hruai loha Lammuala ṭhianhoa an kal kha a mak ka ti a, hmeichhe tleirawl an duh duha awmtir phaltu nu leh pa ka dem che u. Lammual sira hmeichhe tleirawl rui hmuh tur tam lutuk khan rilru a tina ngawih ngawih. Zu ruih hi chu inkhap theih a nih pawh ka ring lova, nu leh pain kan fate ven loha an chhuak tur chu kan khap thei tur a ni a, chumi pawh kan khap theih tawh loh chuan Lammuala eng eng emaw an rui tur inven hi chu a harsa tawh a ni.

Mizote kûtpui ber kan lawm a, kan lawm danin duhthu a sam lo. Duhthusama lawm theih ni lo mah se tunah hi chuan musical concert chi khatah Mizo Kut kan chhuah tawh a, tunlai zaithiamte inpholanna hun ṭha ber, free concert a ni ta. Zai chu kan ngaina a ni mai thei a, Mizo hnam thil nena inzawmna nei lo Sap hla thluk ang chia tunlai Mizo zaithiamte zaina hmun siamsak an ni ta mai mai kha chu Mizo rilru a na. Mipui tlem deuh zawk mah se Mizo zai, pipu zai kan tihlam chi kha uar thar leh a, Mizo hnam lam a tam thei ang ber lantir a ṭha ka ti.

A buatsaihtu lam chuan nuam an tiin hlawhtling an intih ka ring a, a chhan chu mipui an tam. Mipui tam hrim hrim hi sorkar hruaitu leh NGO hotute duhthusam chi khat a ni a; nimahsela Mizo thila pungkhawm ni si Western Musical concert ang deuh chiah chiahin kan kalpui ta a, kan Lammuala grass phahte lah chu, "Khawnge i han chên chhe vek law law mai teh ang," ti niawm takin an chêng ang suau suau bawk si. Kei chuan Chapchar Kut hut hut leh mumal lo ai chuan, tun hma deuha Chapchar Kut khawhar zawk, awmze nei zawka puipun kha auh kir leh ka duh zawk a ni.

Miss an thlang dawn e, an tih vang ni maw, hmeichhe tleirawl tuai nalh tak tak ka hmu nual mai a, an hmuhnawm hle mai. An bialpa niawm takte nen an han kal rial rial kha tlangval tan chuan a hmuhnawm ang a; nimahsela Lammual thlang lama vengtu awm lohna hmuna nula leh tlangval an chhuk thla tam lutuk kha chu ngaihtuah a tithui a ni. Camera lian nei, thu hmel tak tak lah kha an tam khawp mai a, an vei suau suau a, hnawksak tham an awm a ni.

CYMA hi Chapchar Kut lama a thuneitu pawl an ni a, anni tho hi Rangvamuala zu tihrem tumtu leh zurui ngai thei lotu an ni. Chapchar Kuta zu leh ruihhlo dang rui an tam uchuak kha chu an ṭan thar a ngai a ni. Khaw ênga kan hmuh chin piah lamah, khami tlai lam Aizawl dai vel thil thlengte leh Lammual thlang lama an che velte khan rilru a tina a, Chapchar Kut rapthlakzia hi kan la sawi mai ang tih kei chuan ka hlau der tawh.

Chapchar Kut Organising Committee hian kum 2016-a Chapchar Kut an huaihawt leh dawn chuan a pawimawh hmasa chu police duty tur mumal taka dah a ni tih hria se, Police uniform ha ni lo duty dang hi chu kan hlau lovin kan zah lo. Kumin Chapchar Kut angah kha chuan fanute kaltir ngam chi a ni lova, khati nuai nuai kha chu kohhran lam tan pawha ngaimawh tham a ni ta e. Ka thlalak hmuh ṭhenkhatte phei chu zahpuiawm tak tak a ni a, Lammual leh a chhehvela chhun ên laia thil thleng a ni bawk si. Chapchar Kut hlimawm tak ni si, thianghlim leh felfai Zawk hi buatsaih thiam a hun tawh. Tuna an kal danah hi chuan kum 2016-ah ka fanu hi a kût ve lo ang, kha kha Mizote kutpui lawm dan a nih chuan Mizote kut puia a kal ka phal lo e.