Mizoram Hindi Prachar hruaitute Sorkar chungah lawm

Mizoram Hindi thehdarhtu pawl (Hindi Prachar Sabha) hi ni 21.11.1954 a din niin kum 61 lai a lo ni ta a. Hindi ṭawng hmang (Hindi speaking state) kan nih loh avang leh rambuai avangte in harsatna tam tak kan tawk a.

Kan hriat angin India a lo indan khan sorkar rorelna atan hnam ṭawng National language atan Hindi thlan a ni a. Sorkar rorelna, inpumkhat nan, ram pum inlai­chinna ṭha leh thawh­hona kan neih theih nan mipui tam ber ṭawng hman Hindi thlan a ni a. Hma a sawn zel theih nan ram pum state tinah Hindi Prachar Samit/ Sabha din tura ngen a ni a, Central Gov't a in thlung khawm a ni.

Mizoram Samiti chu Assam Samiti hnuaiah 1954-1977 thleng kan awm a. 1977 - 1988 thleng Warda Samiti hnuaiah kan awm a, chuta ṭang chuan mahni in kan ding ta a ni. Kum 2000 aṭang chuan Hindi BA (Praveen) thleng examination conduct theihna pek kan ni a, Hindi thiam kan ngah sawtzia hi kan hre vek awm lo e. Keimahni a din aṭangin tunah hian Hindi BA pass 3384, PU 4105, HSLC 6016 kan nei tawh. Hindi Doctorate 5 leh National Award dawng 4 an awm tawh bawk. Hindi zir duh tan englai pawha zirna examna pawh beih theih reng a ni.

India ram pum Hindi Prachar Sabha

ṭha thlanah 23-na kan ni a, Non Hindi speaking area a ti ṭha ber kan ni an ti. Kum 60 chhung vel hian Hindi thiam lo pawh President an te ṭhahnem ngai takin an thawk ṭhin - Pu Sangliana Ex MP, Pu HK Bawichhuaka Ex CEM, Pu Ṭhuam­liana MCS, Prof. Dar­chhawna, Pu Dar­thankima leh midang tlem.

Hetiang hian office nei loin mi in kan luah kawi nasa a, Assam chuan kum 5 chhungin office ropui tak an nei. Tun hmaa min zawm rawn dilte Tripura leh Manipur-te pawhin an nei ṭha tih an sawi ṭhin.

Chutichuan, tun ṭum sorkar hian nasa takin ṭan an la a, kan CM zahawm tak duhsaknain Sedtt. Complex chhungah kawngpui anin ram zau tawk pek a ni a. Pawisa pukin office tur 70ft x 40ft chhuat hnihna thleng chhun a ni tawh. Central sorkarah sak zawmna tur kan dil reng a, mah se kan hlawhtling thei lo. Chutah Pu CL Ruala MP kan pun a, harsa tak chungin nuai 75 lai min sawi chhuah sak a. Zoram pum Hindi theh darhtu leh zirtirtute kan sorkar chungah kan lawm takzet a. Office, Library leh Hindi Press te kan neih thuai kan beisei.