Generic drugs leh Generic name

Tunlaiin “Generic Drug” tih kan hre ta fo a. Hei hi damdawi tlawm taka lei theihna leh hriselna kawngah hmasawnna rahbi pawimawh tak zinga mi a ni a. Mizoramah pawh ‘Generic Drug Store’ a rawn awm ve tur hi a lawmawm hle. Mipuite pawhin kan la ṭangkai pui ngei ang.

Generic drug chu Damdawi, a hmu­chhuaktute patent hun zo tawh, midang pawhin an siam ve theih tawhho hi a ni. Damdawi thar leh damdawi combination thar hmuchhuak tur hian company-te hian pawisa tam tak (nuai 500 aia tam te pawh) sengin research an nei ṭhin a. Heng an hmuhchhuahte hi an Patent ta a, Patent hun chhung hi kum 20 a ni tlangpui. Hemi chhung hian a hmuchhuaktu company-te chauh hian damdawi hi an siamin an hralh thei a, an damdawi hmuh chhuah chungah khan thutawp an nei a ni. Hemi chhung hian an senso khuhlehna turin Damdawite hi man to tak an chhiar ta ṭhin a. Patent a zawh hnu hi chuan a damdawi hi a duh duhin an siam chhuak ve thei tawh ṭhin a. Hemi siamtute hi chuan research atan pawisa an sen ve loh avangin damdawite hi tlawm te tein an zuar thei ta ṭhin a ni.

Mi tamtakin heng generic drug-te hi a man a tlawm a, an siam uluk lo a, a ṭha lo zawk ti an awm a. Mahse Generic Drug a ni emaw Branded Drug a ni emaw, a siam dan tur leh a nih dan tur standard a awm vek a. Damdawi ṭha lo zawk a awm chuan, dan keng kawhtute hnenah hrilh a, man tir mai tur a ni. Paracetamol chu paracetamol a nih chhung chu eng company siam pawh nise a hnathawh a ngai reng tur a ni.

Medical Council of India chuan Doctor-te chu a theih chin chinah generic name-a damdawi chawh turin a ti tawh a. Hei hi thil ṭha tak a ni. Hei hian a tum ber chu damdawite dik leh ṭha zawka kan hman theih nan a ni ber. Generic name kan tih hian damdawi hming tak kha a ni mai a (generic drug-ho sawina kha a ni kher lo). Entirnan Diclowin hi a brand name a nihlaiin a generic name chu Paracetamol leh Diclofenac a ni.

Generic name-a damdawi chawh avang hian kawng tam takin damdawi hralh, hman leh chawh kawngah hma kan sawn phah thei dawn a. Course hrang hranga Pharmacology zirte chuan damdawi chawh/ hman chungchang kan zir reng rengin a generic name hlirin kan zir a. Khawsik damdawi atan Paracetamol hi a ṭhat thu kan zir a, Larkin erawh kan zir tel lo. Hei vang hian damdawi chawh a tiawlsam ang. A chhan chu damdawi pakhat hian brand name tam tak a nei thei a, damdawi pakhat hi company hrang hrangin an siam a, a hming thar an pe zel a, damdawi pakhat hian brand name 50 chuang te pawh a nei thei a ni.

Heng zawng zawng hi doctor tan hriat vek sen a ni lo a, damdawi chawh tiawlsam sawt tur a ni. Damdawi chawh sa midangin an thlak ṭhinte hi a tlem sawt bawk ang.

Thisen sang damdawi Stamlo hi a generic name chu Amlodipine a ni a. Doctor-in MBBS a zirlai chuan Amlo­dipine hi thisen sang damdawi a nih a zir a, a ṭhatzia a hre bawk. Mahse a chawh dawnah chuan Stamlo-in a chawh a. Doctor dang Amlodipine ṭhatna hre tho khan Stamlo hi a hre lo ve thei a, AmsynemawAmlopres-in a lo thlak thei. Hei hian damdawi inang reng lei nawn tam tak avanga senso a titlem sawt thei a, Doctor an rawn hmasakte kha thiam lo zawka hriatna leh rin lohna awm ve theite a tibo bawk ang.

Generic name a damdawi chawh hian damdawi hmuh a tiawlsam a. Amlodipine anga chawh an nih chuan Stamlo hi dawrah lo zuar mai lo mah se, Amlopres emaw Amsynemaw a lo awm chuan hei hi damloten an lei mai dawn a, kan damdawi mamawhte hmuh a tiawlsam dawn a, bakah damdawi lei dawnah a tlawm zawk a thlan theih tawh dawn a ni.

Generic name a chawh a nih avang hian Generic Drug Store-ah chauh lei tur a ni chuang lo a, Paracetamol i lei dawn chuan Generic store-ah chuan Paracetamol tia a awm laiin Damdawi dawr pangngaiah chuan brand name (Larkin, paracet, parazine, etc) in a la awm tho ang a. Hetiang a nih chhoh chuan damdawi zuartu lam pawh hma an sawn zel a ngai dawn a ni. Damdawi ṭhenkhat damloten an hmuh mai lohin pharmacist-ten a damdawi tlukpui, hnathawh leh nihna inang kha doctor hnenah an suggest zung zung thei dawn a, natna tihdam kawngah pawh hma kan sawn phah thei hle ang. Entirnan Aminophylline a awm loh chuan a Theophylline hi a hnathawh dan inang reng, pek theih mai a ni.

Damdawi siamtute hian Evergreening an tih mai hi an uar khawp mai a. Evergreening chu damdawi patent zo tawh kha a damdawi ngai reng si, tlema a structure siam danglama patent thar leh te, damdawi hnathawh inang reng a derivative siam a, patent leh a, a hmaa mi aia ṭha anga fakte an ching a. Bakah damdawi patent zo tawh, combination thar siam a, a combination patent leh a, a aia toa hralh leh thote hi an ching a ni. Generic name kan hman thiam a, damdawi lo pechhuaktuin a thiam bawk chuan heng zawng zawng hi kan pumpelh theiin damdawi manah kan in sen tlem phah sawt thei a ni.

Hma kan sawn dawn chuan keimahni pawh kan inzir ve zel a ngai. Doctor te, damdawi zuarte leh mipui/ damlote thlengin kan in zir belh ve zel a ngai a, hengte hi nakin lawka hmasawnnain a rawn ken tel turte an ni. Phai lamah chuan generic name deuh hlirin damdawi an chawh tawh a, kan lo in zir ve a, miin an sawi awih mai loa kan tana ṭangkai tawk kan lo hriat ve hi a pawimawh a ni.