Taimakna
Taimakna hi kan hre lar hle a, kan sawifiah dan erawh a inang lo hle ang. Taima ka tih chu eng hna pawh, a ṭulna vanga peih lo chung chung pawha kan thawh hram hramna hi takmakna dik tak chu a ni.
Hmân kumah kan ṭhenawm pa chu a ṭhianten a vir tawk lekin zu an lo khilai a, a kham si lo a.
Zanlai 12pm velah Rangvamual a pan ta nge nge a. He mi tûka ka pa ṭawngkam kha ka la hre reng mai "A va taimak thlak mai mai e aw, khawvawh tehreng nen...” a ti a. Heta ‘taima’ tih ṭawngkam hmanna hi a fuh chiahin ka hre lo. A kal chhan hi a pawimawh lai zawk chu a ni. Thil ṭul leh pawimawh tia kal a ni lo a, a ma châk zawng thil ṭha lo ti tura kal a nih vangin taima kan ti thei lo ang.
Taimakna chu nun hlimna min thlentu a ni. Pathian hian a hrapain mihringte hi hlimna min pe ngawt lo a, mitin in kan thawh rah ang zelin hlimna kan tawng buak tur hi a lo dah zawk a. Engmah ti loa awm mai mai hreawmzia hi lehkha thiam hna hmu lote hian an hre chiang hlein ka ring. Bible-in a sawi angin rim taka a thawh chhuh chu a hluin a thlum bik a ṭhin. Tum mumal neih hi a pawimah viau rualin a ṭul a piang thawk thei tura keimahni lam inbuatsaih pawh hi tunlai khawvelah chuan a ngai.
Taimakna chu sual laka min vengtu a ni. Sualna hun nei lêk loa hna an thawh chuan mi an sual hman lo.
Singapore, Japan, Germany etc. vela an hna thawh ang hian thawk nasa ve ila chu tun ai hian kan khawtlangah pawh suahsualna a tlem phah ngawt ang.
Zahawma min siamtu leh ram leh hnam humhalhna ṭha ber a ni. Mi zahawm ni tur chuan intodelh a ngai a, intodelh tur chuan taimak a ngai. Ṭhenawm khawvengte nena kan inkarah a ni emaw kan state ramri chung changah a ni emaw mahni intodelh lo zawk na na na chu awm hmunah pawr ve hle ṭhin mah ila a sasehah erawh huai-sen a har viau.
Bible pawhin ‘Mihring sum hlu chu taimak a ni’ a tih angin kan taimak phawt chuan mi angin hausa lêlu lo mah ila kan intodelhna khawp kan thawk chhuak dawn tihna a ni. Kan intodelh bera hnu tuin nge min chimral ang a, tuin nge min hnuaichhiah chuang ang?