Chapchar Kut versus Musical Concert

Tun hnai kum nga vel chhunga Lammuala Chapchar Kut hman dan hi ka lo thlir ve ṭhin a, ka ngaihtuah chhuah chu musical concert chi khat karah Mizo hnam lam kan telh ve zauh zauh ang berin ka hria.

Chapchar Kut kan tih hian mi ṭhenkhat chuan tourist hip phet an lo tum ve bawk a, Mizo kut a ni a, Mizoten lawm ila a tawk mai. Chutah chuan Mizo hnam tihdan a pil bo mai lohna turin kan ti thar leh ang a, Mizo lamin kan lam ang a, Mizo zaiin kan zai ang a, Mizo pipute sulhnute phochhuak ila, pipute hunlaia an tih dan entir theihte kan entir sup sup turah ka ngai.

Chutah le, sound system nei ṭha an lo chhuak a, a hawh man pawh a tlawm ka ring lova, tichuan kan Chapchar Kut chu musical concert-ah kan chantir ta a nih si hi mawle. Lammuala Chapchar Kut hman hi chu kei ka ui lova, Lammuala concert hi chu ka la phal thei miah lo. Tunah hi chuan zaithiam kan ko khawm a, kan zaitira ṭhalai rual kan lamtir a, chu chu Chapchar Kut a ni.

Hman deuha Lammuala Chapchar Kuta an lam tirh lam kha chuan KC Runremsangi leh Vanlalhlana te zaiah an chheih a ni ngai a, tunah chuan concert dik tak a ni ta. Kan Chapchar Kut hman dan hi kan hotute hian en nawn se, tun anga kan kal zel chuan Chapchar Kut hi 'modern musical concert' ah a chhuak ang a, en man awm loa zaithiamte zai sound system ṭha tak hmaa chhim theihna a ni ringawt ang a, rui fe fe an pungkhawm zel ang a, Chapchar Kut hi a ṭawp tawlh tawlhin ka ring. Ṭhahnemngaihna au rawl, ka mimal ngaihdan ve mai a ni a, a duh tan hnial theih ka ni.