Kawng chhe siam hnatlang ko ang u

Aizawl khawpui kawng chhuat chhe lutuk chu a manganthlak ta hle mai. Heti em ema chhiaa dah thei tu department hi fak zawk hial tur em maw ni dawn ni. Pawisa a awm lo a nih pawhin puk chawp pawha siam vat vat chi a va ni em! Chuti lo chuan kawng chhe siam hnatlang koh a nih vaih chuan a changtu department an zak ngawt ang a, nunphung a buai nak mai ang.

Hman deuh lawk khan Khatla kawngah tow wheelers-a tlan chu kawng khuar a dai lut a, a chesual a, a thih ringawt kha kan la hre awm e. Tunah pawh hian Aizawl khawpui chhung kawng chhuat chu a mam lai a awm zeuh zeuh chauh a ni mai a, alkatra hmang kher loin lung nawia hnawh mam a harsa viau emaw ni? A enkawltu department officer-te'n ngaihtuahna han hmang deuh se kan va ti ve.

Tun hnaiah cyclone (Remal) avangin Aizawl khawpui dai Melthum, Hlimen leh Aibawkah leimin vangin mi tam takin thihna an tawk a, khami ṭum khan ruah a nasa hle tih hai rual a ni lo. Chuti chung chuan khawpui chhung kawng chhuat chhe lutuk tur khawpin ruah a tam lem lo a, a sur erawh a sur. Ruahsur an puh a nih chuan an kawng chhuat lo siam tawh chu a chhe hle tih a lang reng mai.

MNF sorkara PWD minister Pu R. Tlanghmingthanga hunlai khan kawng chhia a awm chuan pawisa puk chawp pawhin siam zel tur a ti a, a ziaawm viau mai. Tunah pawh PWD-in kawng siam/repair-na tur an nei lo a nih pawhin contractor tu emaw hnen aṭangin puk ve mai se, heti em em chu kan ni lo deuh ang.

Sikulpuikawn aṭanga Khatla kawn te, Khatla kawn aṭanga Tennis court inkar han khuar chhiat ziate hi en ve mah teh u. Bazar Bungkawn a/anga Treasury Square inkar chhiat zia te. Raj Bhawan gate atanga Sikulpuikawn inkarte hi chhe tak a ni.

Hman deuhah Zarkawt leh Chanmari inkarah tui pipe lian vak lo phum a ni a, tunah chuan chetsual hlauhawm khawpin a khuar chhe tawh a, ngaihsak a hlawh lem lo. A mak khawp mai. Heng kan sawi bakah hian khawpui chhung kawng chhuat a chhiat zia chu rapthlak tawh tak a ni. Khua a cheng bur bur bawk si lo a, kum dang aiin ruahtui a tam em em kan hre bawk si lo.

A thuhrimah mipui hian dikna leh chanvo kan nei a ni tih hi a enkawltu department hian hre ve mawlh teh se. Lirthei ngat phei chu road tax kan pe a, chu kan chhiah pek lah chuan kum 15 te a ni dawrh mai a, khang chhiah tlingkhawm kha khawiah nge a awm a? Kan lirtheite kawng chhe lutuka tlantir hi kan phal reng bik lo. Sorkar dan zawma chhiah pe kan ni e.

MNF emaw, Congress emaw, ZPM sorkar a ni emaw, kawng enkawltu department hotute hian minister chet chhuah hun chauh nghak loin, an hna an tlin a nih ngat chuan ruahmanna an siam thei a ni. Ruahmanna siam thei lo officer chu voluntary-in chawl mai rawh se tih hial kan duh tawh a ni. Kei aia Aizawl khawpuiah lirthei ke hnih nei emaw, ke pali nei hmanga tlan tam an awm bik lo mai thei a, a hrehawm lulai tawh em mai a.

- Lalkhirhvela