Chapchar Kût kha
Sawiselna a tam a, tam âwm rêng pawh a ni, kumdang zawng aiin a ṭawp. Chapchar Kût kan hman tâk kha kum dang zawng aiin a kal leh chhim pawh kan ṭha a, programme erawh chu kum dang nen a danglam chuang lo.
Hnam hrang hrang kan sâwm a, min hmanpuitu pawh an lian tial tial niin alang a, mahse kan hotute hian Chapchar Kût hi tihphuisui lehzual tumna em em an nei hran lo a ni ber. Tihhmasawn a, Mizo mipuite ngei tan pawha chhim châkawm leh tel ve châkawma siam ai chuan a buatsaihtute ber hian sum siam nana hman an tum emaw ni chu tiin a ngaih theih ṭhin.
Kan Kût hman ṭhin dan, a Mizona tibo chuang hauh si lo, timizo tial tial chungin, khawvel hmun hrang hranga an kût hman dante thlir chungin, hun ruahmanna ṭha zawk leh nuam zawk a awm thei a, a siam theih chiang a, mahse kan hotute hian ngaihtuahna an sêng ṭha tak tak peih lo niin alang. Sum sên hnem a, nuam zawka siam kan huam lo a nih hmel. Eng zat tak a buaipuitu berte khan hâwn ang maw tih ka ngaihtuah mai mai ṭhin.
Zu thlah zalên deuh zawk tura ngaihnain tun Chapchar Kût boruak a tichhia a, tu leh fate kum danga kaltir zelna atana hmun duhawm lohah kan chhuah. Insual buai an tam a, mipui hmuha tiha mawi lo ti an tam em em. Thuneitute hian khatiang kha an phal chu a ni chiah bik lo ang a, amaherawhchu dan leh thupek kenkawha kan hlawhchhamzia tilangtu a ni. Zu dawr êm pawh kan la hawn hmain khatiang khan kan kût a, zu dawr awm hunah phei chuan engtiang taka nasa ni ang maw?
Kumina kan kût anga kum danga dan leh thupêk kenkawh mumal lo lutuka kan kût zel a nih chuan mi pangngai deuh chin chuan kal enah an en lo tial tial ang a, kan kût hi mi nikhualo deuhte punkhawmna angah chauh kan chantir mai ang tih a hlauhawm.
Thusawi tam lutukte kha a ninawm duh viau. Stage-a zarhliap hnuaia ṭhu chunga thusawi ngaihthlak kha chu a nuam viau a, khatiang hmun chang pha lote kha a tam zawk an nih hmel si a, chîn fo tlak a ni lem lo. Thusawi ngaithla tura kal kan ni lo a, kût tura kal kan ni tih hi programme ruahmantute hian hre tawh se a ṭha hle ang.
Kohhran pisa ṭhenkhatte an chawl lo a, sorkar hian ngen ve ta mai se a ṭha long maw. Kût kara Pathianniah te kohhrante hnenah hnamze lam thil hmanga Pathian thuchah sawi tute hian sorkarin kohhran hote hi ngên ta se a ṭha ngawt ang a, Mizo tak, Kristian tak bawk siin kan kût dawn tihna a ni. Kan kût zêl dawn a nih chuan kan kûtnaah hi naupang pawh an kalna tlaka siam i tum ang u.