RAMRI-AH KA DUTY VE ZUAI A

Ni 18.10.2020 (Pathianni) khan Vairengte daia ramri buaina hmunah kan hruaitute ruahmannain ka zuk duty ve zuai a. Ramri buai awmna hmunah hian ka la lang tlem hle mai. Ka thil hmuh, hriat leh ngaihdan tlem kan tarlang ve lawk teh ang. 

An huaisenna hi a hmuna kal hian a hriat chian lehzual. An ram hi an hmangaih tak zet a ni tih a hriat mai. 

Buaina tawk ngun an nih avangin an rilru a fim ṭan a, bawh hun leh din hun an hre ṭan. Hei hi kan la chhawr tur ber niin a lang. Inrinni zana an bawh huk zarah rawn inbengbel tur an dang leh a nih kha. Hetiang hi thleng lo se an ta chei zui leh ngei ang.

Ka kal ni hi chuan ngaih­chan hun tih an hre khiau mai, khulaia kan intihbuai pui te pawh an rawn lang ngam chuang ta reng reng lo. Vawi hnih thum vel mi pahnih khat an rawn dak leh zeuh ṭhin tih loh chu. 

A hma zana an hahna kha an hahdam phah thei ta hlauh. Chutihrual chuan, boruak awm dawna a lan kha chuan ṭhahnem tak hi an rawn thleng nghal thei zel thung. An fakawm tak zet a ni. 

Khami ni khan, ram hmangaihtu inti mi eng emaw zat kha khawi khawi aṭangin emaw an lo kal khawm a. Sawrkar leh Vai­rengte lama ruahmanna siamtute ruahmanna rawn duh khawp lo an rawn awm ta. Heng mite hi ka haw ta deuh ber maiin ka hria. 

Vairengte lam tena ram awm dan leh vai mizia an chiang em em a. Khawi hmunah nge kal se an dinhmun leh ṭan hmun tur a chhiat theih tih te thlengin an lo tawn tawhna leh chet fuh tawk lohna aṭangin an hre vek a. Chumi zul zui chuan duty ruahmanna an siam a ni tih ngaihtuah reng reng loin. A thu ber, ram hmangaih ber ni awm ziazangin ram tana duty te a haw haw zawng leh ram hmangaih loh ang zawng lek leka rawn chhuahin rawn paltlang an tum leh an paltlang ka hmuh khan a lawmawm ka ti lo hle. Boruak eng emaw an siam a, darkar hnih vel hnuah an kal leh daih a. 

Khaw dang aṭanga kal kan nih chuan a hmun ṭhute ruahmanna hi zawm ve mai a ṭha. In hming te nena duty in rawn chawh buai dan hi ka ziak vak zawk dawn emaw ni! Ram hmangaih in in ti ve hle awm si a. Boruak rawn siam vak a, uluk leh ṭha taka kan IR duty te paltlang kha ram hmangaihnaah kan ngai thei lo, in hmangaih tak tak a nih chuan zuk tlaivar ve ula, darkar hnih khat leka rawn pawr viau kha a nep kan ti. 

Chuan, ṭul leh pawimawh ta bera ka hriat chu, ram kan hmangaih vang emaw, ram tana ṭha tur kan duhna kawngah pawh hian a tuartu leh a daidote dinhmun, kal pui dan hi kan hriat chian hmasak a ṭha. Kan hawsan leh daih a, kan haw hnuah pawh a buai tur chu heng khuate tho hi an ni asin. 

Buai a awm leh zelin a rinawm... darkar hnih khat, ni hnih khat lek a hmuna ram hmangaih tur chuan kal ve tawh suh u. FB velah pawr deuh deuh khan lo ṭawng ula a tawk mai. 

Ramri buai a awm leh hunah a khaw neitute thu leh sawrkar thu ngaichang thiam lo tur chu kal ve tawh suh u tiin kan sawi nawn leh hram ang e. Nangni aiin a ram chin leh an mizia an hre chiang zawk si a.