Gorkha-te OBC nihna pek a hlauhawm em?

Mizorama Gorkha-te'n Other Backwarded Class (OBC) an nih ve theih nan phalsak turin Mizoram sawrkar an ngen thar leh a; Mizoramah sawrkar a din thar apiangin an dil ṭhina sawi a ni. Chutih laiin, Central YMA chuan Mizorama Gorkha-te OBC status phalsak an remtih loh thu tun August thla tir lam khan an puang a; YMA, MHIP, MUP, MZP leh MSU-te telna NGO Coordination Committee (NGOCC)-in an remtih loh thu an puang zui ve bawk. Kan rama cheng Gorkha-te OBC nihna pek chungchang hian tunlaiin titi a titam viau mai a, Mizo mipui ngaihdan pawh a phir viau niin a lang.

Mizorama Gorkha-te hian OBC status chan ve an duh chhan ber chu - sawrkar laipui hnuaia hna lakna leh zirna ina OBC tana reservation/quota 27% hauhsak chu hman (enjoy) ve theih an duh vang a ni. Mizorama Gorkha-te hi OBC an nih loh avangin Mizoram chhung leh pawna hna lakna leh zirna ina seat reservation an hmang ṭangkai ve thei lo a; OBC an nih chuan 27% reservation hnuaiah an beisei ve thei dawn thung. Hei hi chu mi nawlpuiin kan hriat sa a ni.

Kan hriat tur chu, Mizoram sawrkar hi OBC nihna pe theitu a ni lo a, rawtna/pawmpuina (recommendation) pe theitu erawh a ni. Mizoram sawrkarin a recommend a nih chuan sawrkar laipui lama la dil leh tur a ni.

OBC-te hi sawrkar laipui hnuaia sawrkar hna leh zirnaahte 27% hauhsak an ni. OBC-ah hian hnam tam tak an awm a, an tam tham em avangin sawrkar laipui pawhin schedule caste tan 15% leh schedule tribe tan 7.5% chauh reservation a pek laiin, OBC tan chuan 27% lai a pe a ni. OBC tana 27% reservation hi sawrkar laipui hnuaiah chauh a ni a; India rama state dang (state zawng zawng)-in reservation an siamsak ve vek tur a ni, tih a awm lo niin ka hria, ka hriat ve chinah.

Chutih rualin, India rama OBC nei state tin deuh thawah OBC tan reservation siam a ni a, quota an pek zat erawh a inang lo; 1% emaw lek pe an awm laiin, 40% pete pawh an awm. State sawrkarin reservation pek an duh a, an pe a ni mai. An state-ah OBC an tam dan azirin quota an pe a ni ber a; Kerala state sawrkar chuan OBC tan reservation 40% a siam a, a tam chhan chu an state-ah OBC an tam em vang a nih ngei a rinawm, an state population aṭanga 50% chuang chu OBC an ni tlat.

OBC reservation list-ah hian 'creamy Layer' tih a awm a; a awmzia chu - OBC list-a tel hnam zinga officer fate, doctor leh engineer fate leh, kum khata Rs 8,00,000 aia tam la lut fate'n OBC reservation hi an hmang (enjoy) ve thei lo.

India rama OBC-te chu sawrkar laipuiah chauh ni loin, state sawrkarah pawh OBC quota/reservation an nei zel a, an awmna state sawrkarah quota an nei vek tih sawi a awm. Chuvang chuan Mizoram Gorkha-te hnena OBC status pek hi NGO Coordination Committee-te leh mi ṭhenkhatin an duh lo nia sawi a ni.

Sawi tawh angin, India ramah OBC an tam avangin state-te'n an tam dan azirin, an duh angin reservation policy an kalpui a ni. State sawrkarin reservation a pek chungchangah hian sawrkar laipui a inrawlh lo a, sawrkar laipuiin reservation pe turin a ti/nawr lo bawk a. State sawrkarin anmahni duh dan leh an thu liau liauin an kalpui a ni. Chumi a chianna chu, August 14, 2014-a Social Justice and Empowerment Minister of State Sudarshan Bhagat-in Rajya Sabha-a zawhna a chhannaah khan a chiang. India rama state leh union territory 38 zinga 29-in OBC-te state sawrkarah reservation an pek laiin, OBC nei ve tho Tripura state sawrkar chuan reservation a pe ve tlat lo - an state sawrkar thu a ni miau tlat; Tripura-a sawrkar hnathawka awm reng tawhin min hrilh bawk.

NGOCC chuan Mizorama Gorkha-te hnenah OBC status pek ni ta se, sawrkar laipui hnuaia hna lakna leh zirnaa OBC reservation chauh an duh tawk lo ang a, hun kal zelah state sawrkarah reservation an la beisei dawn a, sawrkarah dilin an la nawr ang, an ti a. Chuvang chuan Mizoram Gorkha-te OBC status pek an duh lo a ni. Rin dan a ni a, thil chiang lo a ni. NGOCC-te rin dan hi a thleng dik ngei dawn tih sawi theih a ni lo a, a thleng dik dawn lo tia sawi theih pawh a ni lo.

Mizorama Gorkha-te OBC status phalsak tura Mizoram sawrkara ngenna thlentu ber chu Mizoram Gorkha Sangh an ni. An lehkha thehluhah chuan, an duh ber chu sawrkar laipuia OBC quota hman ve theih a ni a, Mizoram sawrkarah reservation an dil/beisei dawn lo tih an ziak chiang viau. "No prejudice would be coused to State Government and its citizens as the OBC benefits even if any at all are solely for the purpose under the Govt. of India only and not under the State Govt. or any of its undertakings... There is also no question of taking away the benefits and rights available to our brother and sister Mizo's (Schedule Tribe) in any way including Schedule caste," an ti a. OBC an lo ni ta a nih pawhin Mizoram sawrkarah reservation an beisei lo a, an dil dawn lo tih a chiang viau mai.

Miin, "Mizoram state sawrkarah reservation kan dil lo ang, kan beisei lo ang," an ti na nâ nâ a, "An dil ang," lo tihsak luih tlat chu a dik bik dawn em ni? Gorkha-te hi Mizote'n langsar taka kan hmuh phâk chinah chuan hnam rinawm ber pawl an ni hial mai thei a; "Kan ti lo ang, kan dil lo ang," tia an intiamna hi a rin ngam ve dawn lo'm ni?

Kum tam liam hnuah an thutiamah an rinawm lo a, Mizoram sawrkarah quota an beiseia an dil leh ta a nih chuan Mizo mipuiin do patawkin kan do mai ta lâwng. Mahse, chutiang chu a ṭul ka ring ve lem lo, an awmna ram mipui, Mizote tilungawi lo a, tithinrim a, hmelmaa siam an duh ka ring lul lo!

Gorkha-te OBC an nih a, state sawrkarah OBC reservation an dil chuan Mizoram sawrkar tan dan a har tawh ang, thiam takin National Commission for Backward Classes leh court-ah an kal ang a, indan theih a ni lo ang, tih ngaihdan a awm. Ngaihdan awm thei tak pawh a ni. Thil thleng thei lo chu a ni hauh lo nâin, an tih duh a rinawm chiah lo (rin dan bawk a ni!). A chhan chu, state sawrkarah reservation an dil dawn lo tih an intiam a; Mizoram sawrkarin a din Permanent Body report/recommendation-ah pawh state sawrkarah reservation an beisei tel thei lo ang, tia thu delhkilh thlap a ni bawk.

Permanent Body report-ah chuan, Mizorama Gorkha-te OBC status pek ni mah se, OBC dinhmun pek turte chu Gorkha zawng zawng ni loin, January 26, 1950 hma lama Mizorama awm tawhte thlah kal zelte chauh an ni a; chutiang mi chu Mizoramah mi 8,000 an tling lo. Mizoram mipui zawng zawng aṭangin 0.6% vel chauh an ni tihna a nih chu. Sawrkar (ministry) tan political advantage atana han hman viau tham an awm lo.

Tlangkawmna

Gorkha-te hi hnam fel, hnam rinawm tia sawi theih a ni; an zingah mi fel lo leh sual deuhte chu an awm ve bawk ang, hnam tinah an awm. An awmna ram/state-ah rinawm takin an awm a, an awmna ram mipui nen inrem takin an awm tlangpui. Chu chu Mizoramah pawh a ni chiah a; Chakma-te leh Bru-te nen Mizote'n buaina kan neih fo laiin, Gorkha-te nen buaina kan nei ngai lo. Mizoram leh Mizo hnam tana theihtawp chhuahtu an ni a, Mizote min duhsak em emtu an ni a; khaw dang sial hmuh viau tur an ni lo. Khawtlangah chhiat tâwk an awm a, kan thlan laihpui leh mitthi lumennaa kan tlaivarpui ṭhinte an ni. MNF rammu zingah an tel a, hmun ṭhenkhatah chuan YMA branch-ahte pawh hruaitu an ni. Chuvangin, Mizoram leh leh Mizote hian kan duhsak ve an phu em em.

Mizorama Gorkha-te'n sawrkar laipui hnuaia OBC reservation 27% hi an hman ve theih nan Mizo mipui tam takin (kei pawh telin) an duhsak em em a, Mizoram state sawrkar hnuaia reservation an neih erawh kan duh lo vek thung niin a lang. An dilnaah an intiam a, Permanent Body report-ah chiang takin a lang bawk a; an intiam ang lo leh Permanent Body report zahloa Mizoram sawrkarah quota an beiseia an dil leh ta a nih chuan; Mizo mipui hian nasa takin kan do duh vek ang, kan ngam huai viau pawhin a rinawm. Tunah chuan i hlauthawng viau lo ila a dik zawk lo'ng maw?

NGOCC leh Mizoram sawrkar hian Gorkha-te'n OBC an dilnaah hian ngaihtuahna zau tak an neih a ṭul em em a, Mizo mipui náwlpui sûkthlêk pawh an ngaihtuah tel a ngai a ni.

- K Zothanpara