Mizo vs Vai buaina a ni lo

Tunlai ramri a kan boruak chungchangah hian vai hrim hrim hmer zawnga thu post a awm fo mai a. Thil ṭha beiseiin kan sawi ve lawk teh ang. 

Tuna kan buaina ramri a awm vai ho hi, a tam zawk chu dan lova Bangladesh aṭanga rawn lut ru an ni a, ram nei lo an ni. Muslim an ni deuh vek a, muslim ti zawnga kan sawi chuan Mizo vs Muslim anga boruak a kal theih avangin fimkhur a ṭul hle. 

Bengali ang pawha sawi chi a ni lo, Bangladesh aṭanga dan lova lo lut (illegal migrants from Bangladesh) tiin sawi ila a fuh ber awm e. Chuvang chuan tuna kan buaina hi chu Mizo vs Bangladesh aṭanga dan lova lo lut ho (illegal migrants from Bangladesh) inkar boruak a ni ta ber a nih chu. 

Heng ang chi ho hi Cachar phai, Barak Valley-ah hian an tam em em mai a. National Register of Citizens (NRC) Assam a an neih ṭum khan mi nuai 19 vel zet chu Bangladesh aṭanga dan lova lo lut niin an sawi a, NRC list-ah telh an ni lo a ni. Heng mite hi hnawh chhuah tak tak theih an nih tawh loh avangin Assam sawrkar hian vote hmuh nan hman an tum hle ang.

Assam a cheng zingah hian hnam hrang hrang an awm ṭeuh a. A tam zawk hian kan ramri dep a awm ho hi an haw em em vek a, chung mi ho chu lamṭanga kan siam thiam a ṭul khawp mai. Silchar a kan awm lai khan, pa zahawm ve tak mai hi Lailapur a kawng an dang fo hi ka sawipui a. Chu pa min chhan dan chu ka ngaihtuahnaah a awm zui reng ṭhin. A ni chuan, 'Sawng ho saw India khua leh tui pakhat mah an awm hlei nem. Bangladesh aṭanga dan lova rawn lut an ni a,  kawng an dang a; in tuar ngawt zel mai hi a mak ngawt mai. Dan hmangin sawrkar laipuiah thlen ula a fel mai ang chu, um darh vek ta che u' a ti a.  

Zophai buaina chungchangah pawh khan (Silchar Mission Compound a kan awm lai a ni a) a ruk tak chuan thla a bar viau. Amaherawhchu, Silchar Hindu tam tak khan eng vakah an lo ngai der lo! Mizo kha min lo ṭan mah zawk a lo nia. Ram an nei lova, an awmna tur ram an sual chhuah a ngai alawm an ti awlsam et mai. 

Tuna kan harsatna kan sawi chhuah thiam chuan Assam a hnam dang khawsa ho hian min ṭan vek thei. Vai ang zawnga kan hmer vek  erawh chuan kan chan a chau zawk viau thei bawk tih kan hriat a pawimawh. 

Chuvangin, Mizo vs Vai emaw Mizo vs Muslim emaw Mizo vs Bengali ang zawng hian boruak hi kal lo hram rawh se. Kan sawi pawhin Mizo vs Bangladesh aṭanga dan lova lo lut te tiin kalpui hram ang u. 

Hetianga kan puan chhuah thiam chuan Assam chhung ngeia hnam dangte ṭan kan hlawh phah ang a. Sawrkar laipuiah pawh kan buk a rit phah zawk ngei ang. Tun boruak avanga hnam dang driver ṭangkhang, Kolasib a St. Maria School a an eitur an buatsaih sak te hi hriat a va nuam tak em! Nghawng ṭha tak a neih ngei a rinawm. 

Tuna kan buaina hi Mizo vs Vai buaina a ni lo tih a nemnghet a ni.