GAD hian hma la chhunzawm zel teh se
August 12, 2024-a New Capital Complex lama ka tlai lam walk chu New Capital Complex tawntirh lam, Hindi Office thlang kawng kual lai kawng chhak lama private motor park ho chu an motor windshield glass-ah Mizoram sawrkar General Administration Deptt. hriattirna hetiang hian an lo tar a, “MINECO huam chhungah hian lirthei hûn leh dah phal a ni lo a. I motor hi ni 12.08.2024 hma ngeia lo hûng sawn tura hriattir i ni. He hriattir (hriattirna tihawm tak a ni a) zâwm lo chu dan anga hmalaka ni ang,” tiin.
Kan kal chhuk leh hret a, Directorate of Economics & Statistics kawmchhak leh New Capital Complex zawl zau lai kawng sira thei rah leh thlai zuar ṭhinte zawrhna (inphona) laiah hrui thlungin hriattirna tho hetiang hian an lo tar ve leh a, “No vehicle zone, thil zawrh khap a ni. By order, GAD” tiin.
New Capital Complex tawntirh leh a thlang DRDA office leh Central Library inkar kawng chhak lamah hian private motor 20 chuang zet chuan garage-ah an hmang ni ngei tur a ni, eng lai pawhin ding a awm reng ṭhin. Tin, thei leh thlai zuar pawh mi 10 dawn an thu ṭhin a ni. He lai kawng hi office kai hun leh bân hun lai phei chuan a lûn em em chu thudang ni se, kan VIP (minister rual leh secretary rual)-te kalna kawng ber a ni a; hetia GAD lamin hma an la hi a ṭha hle mai.
Chutihrual chuan, kan ngaihdante lah hi a inang leh pek miah lo vang le? Hetia hmalakna lo awm ta pawh hi a sawisel pawl pawh awm leh ngei turah ngai ila, party politics ang zawnga lo kai lut duh ṭalh pawlte pawh kan awm leh mai thei. Amaherawhchu, motor kan leia registration kan tih dawn khan garage ka nei e, tiin mahni local council ṭheuhte hriatpuinain motor kan register thei chauh kha a ni a. Kan garage neihna hmuna motor kan dah mai hian tuma’n min sawisel thei lo vang tih hi thil chiang sa a ni.
Hetia he lai hmuna motor a ding khawm ṭhinin a hrin chhuah leh a kalpui pakhat chu ruihhlo tihna hmuna hman ṭhin leh a bul vel ṭawp em em hi a ni. Chutiang bawkin Aizawl kawngpui dunga zau lai leh âwl lai deuh apianga ‘BAZAR’ kan siam a, thil kan zuar ta mai ṭhin hian nghawng tam tak a nei fo mai. Chung zingah chuan bawlhhlawh hi a ni; duh duhna hmunah kan paih tawh mai bawk ṭhin si a. Smart City intih ve tawh nâk alaiin khawpui a tiṭawpin a va tirimchhe ṭhin tak!
Hei mai bakah hian, he lai kawng hi sawrkar hmun pawimawh leh VIP-te office kaina kawng ber a ni a, security thil atan pawh he lai thenfai hi chu thil tihmakmawh niin a lang. GAD hmalakna hi a thlawpawm hle a ni.
GAD lehkha târ hi a tam zawk chuan thuawih takin an zâwm ang a, motor pawh an dahsawn ang a, inpho ṭhinte pawh an inpho/inzuar tawh lo turah ngai ila. Chutih laiin, tlema luhlul zual deuh leh he lai hmuna motor dah phal a ni lo tih hre lo leh inpho/inzawrh phal a ni lo ih hre lo pawh an awm ngei turah ngai ila. Chuvang chuan, GAD lam hian an lehkha târ hi duhtawk mai lovin, an lehkha tara an ziah lan ang ngei hian, thuawih lote leh hre lote chungah hian hma la chhunzawm tak tak zel teh se. GAD hmalakna hi Aizawl khawpui then thianghlimna hmalakna bul ṭanna pakhat lo ni mawlh teh se.
- R.L. Rindika (Diktea)