MIN NEK NASA TAWH EM ALAWM!

Kan ram chhung ngeia kan ngaih, Thinghlun ram thlam min halsak a, a tuk lawka kan hotute zuk kal chuan, hetiang thua an zuk thlamuan thu, social media-ah kan lo hmu nghal a.

"Inches khat pawhin tawlh kan tum lo" - Dr. Z.R Thiamsanga 

"India pawh do ngam chuan, sorkar pakhat hi kan hlauh ring suh u." 

- Er. Rinawma

In lum lam aṭangin kan Home Minister pawhin, "Ram leh hnam chhanna tur chuan, a ṭul chin chinah kan kal zel dawn" a lo ti bawk. 

Chutichuan, DC level-a inbiakna neih zui a ni a, thlam min halsaktute chu, kan thinrimzia zuk tihlan kha a tawk viau laiin, inbiak zawhah Mizo ipte, (Khiangkawi ipte) kan pe lehnghal niin, social media lamah kan lo hmu leh ta zel a! Kan hotute vaupung a nat tehreng nen, han polite khum vak pawh a ngai emaw ni? 

Chutichuan, Thinghluna IR duty na tur, tlawmngai pawlten an sak hnuah, MZP lamin thlam an sa zo chauh va,  Saihapui V lamah VLTF te riah buk sak chu, tlawmngai pawl lam an duty theih tawh loh avangin, sorkar lamin IR an duty tir lehnghal a. Assam lam aṭangin an riahbuk chu ṭhiat turin thu an hmu a, zan lamah an rawn ṭhiahsak leh mai hlauvin, civil miten tlaivarin an venpui a ni awm e. A tuk khua a lo var a, Assam lam chuan police trip 3 leh civil mi tam tawk nen an rawn nawr thut mai a, keini lamin IR mi tlemte chauh kan ventir si a, duty buk chu min ṭhiahsak leh ta. 

Tumah mahin kut thlak lo tura sorkar hotu lian ve veten thu an tih tluk hnuin, Vairengte leh Lailapur inkarah, Assam lam mite chuan, chenna in leh dawr an sa tawh bawk a. (Vanglaini 6, Oct. 20) 

Hemi hmunah hian, Assam Forest Department ten in an sak avangin, nikum July ni 2, 2019 khan nasa takin state pahnihte kha kan innawr tawn a, Mizoram Police te chuan Vairengte check gate aṭanga meter 100 vela hlaah IR platoon khat (30) an dah nghal a, Assam lam pawhin Mizoram lam hnaih ber in aṭanga meter 30-a hlaah, Assam police-te an rawn dah ve bawk a nih kha. Boruak ṭang tak hnuaiah, thuneitute inbiakna avangin, kan in ṭhaṭhen thei hram a. Mahse khami ṭuma kan buaina ber, Forest Department in sak kha, chhunzawm leh tho a ni a, tunah chuan nghet takin an lo luah fel der tawh a. (Vanglaini  2, Oct. 20) 

Zophai hmuna MZP ten chawlhbuk an sak pawh, thisen chhuahna hial thleng mah se, din puitlin theih loha a awm laiin, a bul lawka Muslim biak in sak erawh chu, nghet takin an din hmiah tawh bawk. 

Heti taka an nawm an maka min nawr tawh hnu hian, Vairengte bula kan police duty an rawn vawm zui a, an chet dan em em hi Mizo tlangval ril a fan ta. Tumah mahin kut thlak loh tur tihna hmuna dawr an sakte chu, halsak an ni ve ta a nih hi. 

Ramri buai hi: Mi thil hriaten ramri buai kan neih hi, sawi fel harsa tak a nih tawh tur thu, social media lamah an aupui nasa tawh a, sorkarna lo chelh tawhten dem an hlawh hle bawk. Ramri buai hi keini ang chuan, a chhungril kan hre pha ve lova, kan hriat ve chhun chu, tumah mahin kut thlak loh tur tih huam chhungah, Assam lamin kut an thlak nasa tawh hle a,  kan ram chhung nia kan ngaih thlengin, kan thlam leh bukte min rawn ṭhiahsak a. Kan hotuten vaupung na tak hmangin, min ṭawng thlamuan, tih hi a ni mai. 

Kan hotute min ṭawng thlamuanna, "Inches khat pawhin tawlh kan tum lo. India pawh do ngam chuan, sorkar pakhat hi kan hlauh ring suh u, tihte leh, Ram leh hnam chhanna tur chuan, a ṭul chin chinah kan kal zel dawn" tihte kha mipui chuan thu takah kan ngai hmiah mai a. Tuna kan hotute hi India pawh do ngam kha an ni tak tak a. Mizo nationalsim puan min sinpui ang tih hi, mipui ten beiseina sang tak, an chungah kan nghat tlat a. 

Ramri buai chinfel chu a kawng a lo thui deuh a nih pawhin, an sorkar chhung hian, vaupung mai ni lo, inremsiamna eng emaw tal chu an buatsaih ngei ngei kan beisei tlat a. 

Chu mai bakah, Assam lam hi, an nawm an maka che thei tawh lova, kan sipai huaisen tak takte, hman ṭangkai an thiam kan beisei bawk. 

Saihapui V ramri ven buk min ṭhiahsak ṭuma kan tlawmziate kha! Vengtu sipai kan dah tlem em avangin, zam ngai lo val kan ni lo'm ni? tih hla sa ṭhin thinlung aṭang chuan, "Khawnge kan police te?" tiin min au ruai mai a nih kha. Report a awm hlek chuan, kan sipai huaisente hi, tirh chhuah vak mai tur a ni dawn lo'm ni? Chu chu kan sorkar chak tak laka mipuite beisei chu a ni e.