Inremna mamawh Mizo Kristiante

Remna hlutzia kan hre ṭheuh awm e. Pathian fakna leh rawngbawlna kawngah pawh remna a awm loh chuan thinlung aṭanga fakna tak tak leh thawhhona ṭha a awm ngai lo; kan mamawh >m >m hi kan va tlachham si em!

Ram leh ram inrina (Boundary) vangin kan inṭhen darh a, kan kristian pui chu sawi loh kan chi pui, ṭawngkhat kan hmanpui te ngei pawh ral hmuha hmuin kan rikrap a, a chang leh an lakah tukluih chhiah kan phut a. Kan pek theih loh nunna hial kan inlaksak ta.

State khata cheng­ho pawh eng kan ni ta lo; changkanna leh hmasawnnain min nuai chingchi v>t a, ṭhenawm khawveng ngaihsak loin mahni ṭanghma haiin kan buai ṭhin. Kan in sak a inhnaih tial tial a, kan rilru erawh a inhlat telh telh si. District, Block leh veng hrang hrang rilru puin kan inṭhen darh leh a, khua leh khua, veng leh veng in ep nasat ṭhinzia te hi!

Politics huangah lah hmelma leh ṭhian pawh an awm tak tak thei ta lo. Dawt thu leh thu puarpawleng mai mai hmangin kan inbei vak vak a. Assembly House-ah meuh pawh vai mi lem bia kan tih te ang thoin kan intin uaih uaih a, ṭawngka mai kan duhtawk ta lo.

Kohhran tal chu han ti ila Baptisma kan inchantir dan inan loh vang ngawt paw’n inchibai a har ta a nih hi. Missionary thlen champhaphak avang ringawt pawhin kan innghirngho a, dik zawk nih inchuhin thuziak leh ṭawngkam feikibar hmangin kan inchal tauh a. Chawlhni dik leh dik lo tih avangin kan inṭhen leh phawk bawk a, Pastor-te pawh an bang ta lo.

He zawhna hi ka inzawt nawn fo ṭhin, “Engati nge remna Lal Pathiana neitu, ṭawng pakhat hmang, Hla Bu pakhat a mi hla sa ho a, Bible pakhat ring si te hi kan inthurual theih loha, kan inrem theih loh aw?!” tih hi.

Kohhran ṭhalai pawl hrang hrangten ‘Joint Fellowship Programme’ neih tuma hma kan han lak ṭhin pawh hian ṭhalai lam chu kan inlungrual viau a. Mahse, a remti lotu chu Kohhran hruaitu minte an ni fo mai! Kohhran =halai Rorel nikhuahah kan inpalai tawn leh mek a, kawl a >ng ṭan dawn ta ni te paw’n a lang a, a lawmawm hle mai.

Kohhran pawl hrang (Denomination) vanga inṭhen hranna hi - Krista aia Sakhuana chawisanna a ni tih kohhrante pawh hian hre nawnin he remna palai hna hi tute emaw kuta dah mai loin pen chhuak ila. Pathian faa vuah kan nih theih nan remna siamtu nih i tum ṭheuh ang u.