Fûr lai–Tui luankawra ek paih hun?

Kum tin fûr lai hian ruah a sur nasa a, tuihâwk luankawra leng lo khawpa tam tuihawk a awm fo. Aizawlah chuan tui luankawrah hian tuihawk bakah ek thli a tam ṭhin hle.

Mizorama khawpui lian ber leh mihring cheng tam berna, incheina leh ei leh in pawh khawvel ram changkangte aia hniam bik lo Aizawl khawpuiah hian thil ṭawp ru tak pakhat a awm a, chu chu fûr laia mahni in leh lo hnaih tui luan kawra ek paih chingte thil tih hi a ni.

Khawpui chhung hmun hrang hrangah tui luankawr a tam em em a, heng hmunte hi in lian tak takin an karcheh ṭhup a. Tui luankawra tui a tam lai hian tute ek emaw ni chu tui luankawr hnaiah awmte tana awm hrehawm khawpin a rawn luang tel ve ṭhin; mitin hmu lo mah ila hnâr erawh chuan a hmaih lo khawp mai. Hriselna atan pawh a ṭhat a rinawm loh.

Mizorama mi hausa leh neinung, mi langsar leh mite ngaihsan tam zawkte khawsakna khawpuiah hian engati nge a paihna hmun loah bawlhhlawh chu sawi loh, mihring ek thlenga paih duh an awm ṭhin le? A tam zawk chuan zan lam, ruahsur tam hun an chuh ve ziah leh nghal. Kuminah pawh chhun pachangah Aizawl veng pakhatah chuan ek paih an awm mai kha, a zialo khawp mai. A video pawh social media-ah an thehdarh nasat em kha!

A hmun loa ek paih hi ṭhenawm khawvengte zah lohna leh khawpui tihbawlhhlawhna a ni a, ek paih hna thawk tam tak an awm tawh laia hetiang thil ti duh an la awm ṭhin hi chu a pawi tak zet. Khawpui enkawltu AMC lam hian an hnuaia local council-te kaltlangin hmalak dan ngaihtuah se a ṭha khawp ang.

Faina leh thianghlimna kan inzirtir nasa a, mi fel tam taka awm mah se, mi fel lo tlemtête avanga fûr laia khawpui uih kan ni fo mai hi a mawi lo a ni. Khawpui enkawltute hi han ṭang deuh se la, thunun ngaite thunun thei turin an thuneihna hi hmang ṭangkai mawlh rawh se.

- Johny Chawngthu_95