Chapchar Kutah i fanu kaltir rawh

WhatsApp, Face­book leh Chanchinbua Article lamah te kum­ina Chapchar Kut hman zawh tak chungchang thuziak ka hmuhin eng emaw ziah ve ngaiin ka hria.

Wikepedia lamin a tarlan dan chuan Chapchar Kut hi 1450 - 1700 AD velah Suaipui (Seipui) khua aṭanga inṭan niin tarlan a ni. Mizorama Chanchin Ṭha lo thlen hnuah kum eng emaw zat hman loh a nih hnuin, kum 1973 aṭanga hman ṭan leh nia tarlan a ni.

Kumin Chapchar Kut hman zawh takah "Zu rui an tam lutuk... Lammual thlang lamah nula tlangval chhuk thla an tam lutuk... Camera lian nei, thu hmel tak tak an vei suau suau, hnawksak tham an awm... blah blah blah..." tia lo sawi tawk lah bo lo.

Pastor, Kohhran Upa, Missionary, Evan­gelist, rawngbawl­tu rual kalkhawm an ni lo a, a felfai vek thei lo. A thu hrimah mi camera neih len thu vel mai mai patlingin lo buaipui vak hi a ṭul lem lo. An suma an lei a ni a, an duh duh danin an ti ang chu! Chutih laiin, mi dang tana hnawksak lo zawng zelin awm tlang ila.

Field-a ṭhalai eng emaw zat an lam suau suau lai khan Lammual chhak lam tlanga ṭhu, ṭhalai mi eng emaw zat chuan tih tak zetin, "Hnehna chu Lalpa ta a ni," tiin uar takin an au a. Ṭawngṭainate pawh an nei niin an sawi. Chapchar Kut hmanga kalte kha ṭhalai awm ṭha duh lo an ni vek bik lo. Zu khapna dan hlipa 'khuahkhirh' hnuah pawh kum dang ngaihtuah chuan kan hmang fimin kan felfai zawk tia sawi mi eng emaw zat an awm ve bawk. Kut hmangtu tam zawk khan 'fim' takin an hmang.

Christmas Card te kha tuma'n i inthawn tawh lo ang u kan ti lem lo. Hunin a rawn thlak a, kan in thawn vak vak tawh lo mai a ni. Mizoten English Premier League kan en tirhte kha chuan jersey lian pui pui, thawl zet zet kha an ha ṭhin a, tunah chuan tawt tak takin an ha tawh. Hmanlai chuan mipa sam a sei a, "hawh u le kan lu hi i met kawng vek tawh ang u le" an ti lo, hunin a rawn thlak mai!

Chapchar Kut kan hman danah pawh a kum telin thil inthlak danglam a awm lo thei lo. Tlai lam hun reilote chhunga zaithiamte zai avanga 'Modern Musical Concert' a ni ringawt alawm le lo ti tawk lah bo lo. Chapchar Kut hma daih tawh khan Veng hrang hrangah hnam lam chi hrang hrang zir ṭhin a ni a, he chapchar kut avang hian hnam lam thiam ngai miah lo, mi eng zatin nge thiam belh ang?

Chapchar Kut lawm­naa kal tum avanga Mizo thuam la ha ngai miah lo, zo thuam lei thar phah mi eng zat nge awm ang? Hetiang khawpa thalaite tana 'enjoy' tur awm lohna ramah hian, thalai eng emaw zat rilru engthawl tak maia ni khat pawh ni lo, tlai khat an lam suau suau kha an lawmpui awm zawk lo maw?

A chhe lai hre em emtu ni ringawt loin a chhe lai siamṭhatu nih tumin hma lam i pan zawk ang u hmiang.