No VIP/ VVIP
Bharat, ram ropuiah hian mi zawng zawngin VIP nih kan châk a, keimahni tâwkah pawimawh êm êm vek kan duh. Kum 2009 aṭang daih tawh khân ‘VIP culture’ tih hi mithiamten an lo debate tawh a.
Sweden ramah chuan mi tu pawhin (thingpui sem aṭanga minister thlengin) traffic rule an bawhchhiat chuan chêng 1200 - 28000 thleng an chawitir ṭhin.
United Kingdom-ah chuan VIP culture hmuh tur a awm lo a, mi lâr emaw officer lian emaw pawh ni sela, dân bawhchhia chu hremna a thuhmun vek. Japan ramah pawh dân hnuaiah tu mah an danglam lo. New Zealand-ah chuan Prime Minister Helen Clark chu motor a khalh chak avangin man a ni.
2013 kum tâwp lama Delhi Assembly election-a rawn invawrh Arvind Kejriwal chuan VIP culture tihtawp a tum a, VIP anga enkawl a duh lo. Amaherawhchu, Jan Lokpal bill pass a nih tâk loh avangin a bâng a, 2015 inthlanah chuan Assembly seat 70-ah 67 la-in namên loin a rawn chak leh ta a ni. Tunah pawh VIP/VVIP anga enkawl a duh lo.
NDTV hmalâknain tunah hian ‘No VIP campaign’ kalpui mêk a ni a. No VIP/VVIP campaign-in a tum ber chu VIP culture tia an sawi ṭhin, minister, MLA leh sawrkar hotu liante intih lalna mai bâkah an chhûngte intih milenna tihbo a ni.
A bîk takin minister/ MLA fate hi an pate avangin an lo chapo ta ṭhin a, VIP emaw intiin security check paltlang an duh lo fo. Mizoramah pawh heti ang thil hi sawi tur a awm leh zeuh ṭhin.
Hmân deuh khân SP, Traffic-in “Minister leh MLA-te hi khuallian tura an sâwmin hma taka thlen a mawi si lo a, tlai deuh hlekah an chhuak a, a hun taka an thlen theih nân kawng kan lo sialsak ṭhin...” a ti. Kohhran upa leh Pastor-te pawh thu an sawi dâwnin pawimawh âwm takin ṭan dâwnah an thleng chauh ngai lo a, mipui kal hmain an thleng zâwk ṭhin. Minister/MLA an nih avanga thlen hma kha a mawi lohna a awm bîk miah lo. Kohhran upa leh Pastor-te mipuite tâna thawk tura kan beisei laiin ram hruaitute erawh lal anga kan en daih hi a fuh zân lo.
Chapchar kût ni khân chawhma dar 11:30 vêlah Zarkawtah ka tlân a, Chanmari lam aṭanga rawn phei VIP light vuah kha traffic jam kârah a rawn inhnawh nasa mai a. Two wheeler takngial pawh a tlân hleithei lo kha a ni a, horn a hmet ri tuar tuar a, traffic police kha an khawngaihthlâk hlein ka hria.
India ram lairil zâwkah VIP culture tihbo tuma ṭan an lâk mêk laiin Mizoramah pawh he culture hian zung a kai nghet ve ta hle.
Lal nei ṭhin kan nih vang nge, VIP dik tak mipuite hian kan nihna kan inhre ṭhin lo. Nang leh kei hi kan harh chhuah a, he VIP/VVIP culture hi tibo tura ṭan kan lâk a hun ta. Mi zawng zawng hi Pathian leh dân hnuaiah kan intluk tlâng vek a ni.