Tui semtu lawmman pek thu

Tun thla tir lam khan PHE Minister Zodintluanga leh Mizoram Consumer Union hruaitute ṭhu­khawm chuan tui semtu ṭha thlan an tum thu an sawi tih Vanglaini chan­chinbuah ka lo hmu a. A hnu lawkawh Vanglaini Editorial-ah tui semtu ṭha lawmman pek chung­chang a lo lang leh a, editorial thlawp zawng hian ka rawn ziah ve duh a ni.

Tui semtute hi PHE hnuaia hna thawk, sorkar hnathawk an ni. Sorkar hnathawkte hi hna an thawh ṭhat avanga chawimawina pek chu a ṭha viau pawh a ni thei e.

Amaherawhchu, veng hrang hranga tui semtute hnathawh dan chu mipui hian kan hre chiang viauin a rinawm a, lawmman peka hna thawk ṭhat sawt tur chi an ni lem loin ka hria.

Ui leh zawhte duat dan chungchang mi sawi an sawi chhawn leh ka hre thawi a. Ui chu keh thei dawma dawma eng tia nasaa duat pawhin an chapo ve ngai lo a. Office ban leh bazar haw mai maite pawhin an theih tawpa ṭhain min lo hmuak ṭhin a, a thla tel zin bo san mah ila min lo lawm thiam em em ṭhin.

Zawhte erawh chu han duat deuh ila nuam an ti viau a, an nunphung pangngai hloh ṭhakin duat an nih an in hria a, khumpuiah te mut an tum nghal hial ṭhin.

Sa han kan hmui deuh chang phei chuan an duh em em bawnghnute chawm an han ei ṭha duh lo nghal a, sa rim hmui an chan loh chuan chaw nghei an thlang zawk mai ṭhin. Hetiang hi ui leh zawhte dinhmun chu a ni.

Kan tui pute hi ṭha taka hna thawk ṭhin an ni a, ruah sur leh ni sat pawh sawi lohin Aizawl mipuite tui in tur semin an buai a. Luhai deuh chung pawha tui sem ṭhulh duh chuang lo pawh an ni hialin a lang a, duat sual theih pawh an ni vek kher lo maithei.

Amaherawhchu, mihring mizia a inang lo a, lar tlin lo zaithiam tam tak an awm an tih ṭhin ang deuh hian chawimawi an tum kan tui semtute hian he ruahmanna hi an chhiat pui zawk ang tih ka hlau tlat.

Hemi ṭuma an thu sawi lawmawm tak erawh chu tui bill dik lo complaint a awmin bill pek phawt ngai ṭhin chu an titawp ta tih an sawi a, a lawmawm.

Electrict Deptt. pawh hian hetiang hian ti ve thei se. Electric bill sang lutuk complaint changa bill pek phawt a ngai, an tih ṭhin hi sim ve ngam khawpin huaisen ve tawh se aw...