Mizo nula hmelṭha mal man nei lo!

Kan ṭhianpa pakhat chuan fiamthu in, "Mizo nula mal hlim lang tur chuan camera neih a tawk," a ti. A ni lah tak a, social network-in min luhchilh hnuah camera changkang neih kan intihhmuh chhunzawm a, hei hian kan nulate mal a hlim lan nasat tawhzia chu a hretu te vek kan ni.

Kan nulate rilru a dik lo

Social network leh camera changkangin chiang taka min kawhhmuh chu kan nulate rilru hi a lo la sang lo hle tih hi a ni. Facebook profile picture likers ngah tih vel hi an rilruin a lungkham phak tawk a la nih rih avangin cameraman ṭenghneng te te hmaah an inhlim lang ta vak vak mai a ni.

Mi ram nula te mal hlim lang chuan a dollar maktaduai tel an lak luh phah a, keini ram nula mal hlim lang chuan facebook-ah likers an ngah phah! Nula te u, Mizo mipa diktak chhungkaw din pui tlak khawpa mi pangngai chuan mi zawng zawng hmuh tura nula mal hlim lang - hlawh neih phah chuang lo hi nupui atan kan it lo. Harh rawh u.

Khuareia la inchhir tur kan nulate

Hmanah chuan diary kan nei ṭhin a, kan thil ziah miin an lo hmuh chuan kan thin a rim a, zakin kan kimki ṭhin. Tunah chuan miin min hmuhsakin min hriatsak lo ang tih hlau niawm takin vantlang mithmuh leh hriatah kan nundan zawng zawng social network hmangin kan tarlang a, kan zak lo.

Vawiina kan nulate hi nakinah mi nu in la ni dawn a, nakinah fa in la nei dawn. Tunah rih chuan in mal in tih lan tam vangin tlangval 'hetiang' lawm tawk te te betu leh 'it' tu che u in ngah a, nuam in ti rih a ni maithei. Mahse, nakinah pasal in neih dawn hunah 'inneih sawmna card' in semchhuak ang a, 'Facebook-a mal hlim lang thui thei deuh kha tiraw hemi te mo tur hi?" tia miin an zawh hunah in inchhir ṭan ang. Nula quality pangngai takin in tih ang hi an tih ve ngai loh avangin mi hausa fapa, chhungte thawhchhuah zara milian pasal tur i hmu fuh hlauh a nih pawn mite'n sum vanga neiah an puh che ang a, i hnungah an nuih tet tet ang che.

Fa nula tlangval in la nei ve ang a, nundan mawi hrilh tura in ka in an hunah in fate'n in nulat laia in mal in hlim lanna leh in intih sexy tak takna thlalakte hi an la kawhhmuh dawn che u. Chutih hunah chuan in inchhir ṭan ang.

In man a tlawm lutuk

Hmeichhe man Rs 420/- hi in man tak tak emaw tiin lei rual loh khawpa to in nihzia ngaihtuah loin in man tlawmzia in tlangaupui a, heti taka tlawm inti si hi a aia tlawm zawkin, camera neih vang maia 'photographer' intite pawh pharin in awm a, ni sen sa hnuaiah hlawh nei loin in dingkawisawi a, in mal in hlim lang a, in awm nem in ti lian a, tlawm in lo inti tak tak lo em ni aw tih mai tur a ni!

Nula te u, nangmahni pawt­phartu 'photographer' intite ngei pawh hian an ngaisang lo che u a, in hnung lamah an ṭhiante bula insawitheih nan leh in lak vung nan vel mai mai a ni an hman che u.

Mahni inbum kan nulate

Population ngaihtuaha chanchinbu ngah ber hnam kan ni hial maithei. A bik takin monthly magazine siamtu ringawt hi khaw thar kai tham zat zet kan nei ta. Internet vela thu rapthlak serial killer chanchin leh thu holam te te 'bialpa te hneh theih dan thuruk' tih vel inziahna magazine kawmah in thla a chuang a, mi lar emaw in han intih phah te hi nangmahni leh nangmahni in inbum mai mai a ni. Public transport-a chuan in lo zah phah a, in neih phak bak silh leh fen a ba thlau a in lo inbel phah a nih ngat phei chuan harh i ngai tawh takzet a, nangmah leh nangmah i inbumna lak ata hi tlanchhuah i ngai tawk takzet a ni tih a lang.

A tawp berah chuan Mizo nula, sum i lakluh phah a, nangmah i intodelh phah a nih chuan tuman kan dem lo ang che. Mahse, hlawh nei lova tuna pawh phar mai mai i nih dan aṭang hi chuan tuman an ngaisang ngai lo ang che. I hnungah an nui tet tet a nia!