Chapchar Kut ṭha zawk

Chapchar Kut Organising Commi­ttee-ah hian tel ve ta ila, i duhthusam angin programme han duang teh min ti se, hetiang deuh hian ka duang ang.

Ka sawi tur bik hi Aizawla kan hman dan a ni. Tun anga hmun khata kan hmang ta rau rau a nih chuan chawhma programme hi kei chuan ka paih vek phawt ang. Mipui nawlpui hi an duhna hmun thleng phawt se, traffic jam vanga kawngpui indaih loh vanga kan buai nuai nuai hmain Chapchar Kuta tel ve lote hi chuan an kal tumna kal phawt se a ṭhat ka ring a ni.

Tichuan, chhun dar 1:00 vel aṭang­in programme kan nei ṭan chauh ang a, chutah chuan traditional dance leh folk song lam hlir kan hrut ang. Hnam lam leh Mizo zai pangngai hi Chapchar Kut-in a ken tel tak tak zawk a ni a, a cheimawina tur ang taka tunlai zaithiam nena inthlan pawlh anga inzai chhawk hi chu thil tih loh tawp turah kei chuan ka ngai a ni.

Kan duh a nih rau rau chuan Chap­char Kut hma ni emaw, a zawh ni emaw hi 'modern musical prog­ramme' tiin buatsaih mai se. Tuna Chapchar Kut kan kalpui dan kha han thlir kir ta ila, Mizo mipuite tana programme pawi­mawh tak, kum khata vawi khat chauh kan neih kan Kut pawimawh ber nia hiala mi tam takin an sawi Chap­char Kut hi MZI in­hmuhkhawm-na ang maiah kan chhuah chu a ni ber e.

Tunah chuan, "Chupa chu a zai ṭha," tihte leh, "Chu­mi group chu ka rin aiin an zai chhia," an han ti vel a, "Mizo kût nge nge a lo ropui hle mai," tih a awm tawh lo a ni.

Tuten emaw Mizo Idol leh Youth Icon an han siam leh ang a, chu mite pawh chu an han zai lehnghal ang a. Chapchar Kut chu zaithiam lar tawh leh zaithiam lar tharte inhmuh khawmnaah kan chhuah ta a ni ber a, ṭhenkhat zaithiam thar chher chhuah nana hman tum tlat lah bo lo.

Tunah hian ka rawtna angah chuan musical event hi Chap­­char Kut-ah kan telh duh a nih chuan a hranpain awm hlawk mai se a ṭha ka ti a, Mizo zai leh lam ringawt emaw Mizo tra­ditional dress entir­naah emaw Chapchar Kut hi chu fir takin hman ila. Hetianga kan tih avanga mipui kan kal tlem ta deuh a nih pawhin a hlawh­tling zawk ang.

Mipui tam hrim hrim hi hlawhtlinna anga kan ngai a nih chuan, "Chumi veng nula chu Chapchar Kut-ah a inphelh ruak dawn e," ti se an tam ber ang. Chu chu Chapchar Kut nen inzawm loah kan ngai ang. Amaherawhchu, tuna Chapchar Kut kan hman dan, mo­dern music nena concert ang ziazanga kan ti vak khan Mizo kut pawimawh tak kha a tihlu bik chuang em ni? Modern music hi Chapchar Kut nen a inzawmna ka hre hauh lo.

Tuna kan hman danah chuan Mizote Kut pui ber chu FREE CONCERT ah kan chhuah ta a ni.