Ka pa chu MLA a nia

Ka pa chu M.L.A. a ni a, kan chhungkua mai ni lo, kan vengte paw’n an chhuang a, a tlinna bialte pawhin ruai an ṭheh hial a ni.

Ka pa hlauh ber chu, a campaign-na senso hmuh let loh a ni. Hma takah a tho a, zing ṭawngṭai a thulh ngai lo. Sorkar hna ruak a awm chang chuan ka pa hmu duh an tam lehzual a, contract lian tham a awm chang phei chuan pawisa kan ngah thei hle a, kum hnih hnu velah chuan a hna pekte chu hluihlawn a ngai leh ṭhin. Zinga hmutu an tam ṭhin em avangin sorkarin hna ṭan hun a tihah pawh a thleng hman ngai meuh lo.

MLA a nih avangin chhun­ah thil hawng turin a chhuak deuh ziah ṭhin. KS ang maiin an ko phar reng a, a lu mai ni lo, a ke thlengin a hai ṭhin. Inthlan dawna ṭhahnemngai taka campaign puitute chu contract a pe ṭhin a. An duh apiang a pe ṭhin a, mah se ka pa rilru chu an hre der si lo. An pian hma aṭang tawha an party lo vuan ve ngar ngartute chu khawngaihin a rem rem hna a pe ṭhin a ni.

A dam hun chhung daih tur kum 5 chhunga a han thawk chhuak tur chu a chang chuan ka huphurh-pui thei hle a, mah se kum 3 chhungin kan mamawh ang zawng zawng deuh thaw chu kan nei hman vek a ni. A bial chhunga thihna a awm changin pawisa a pek a ngai ṭhin a, a hlawh ringawt chu a indaih lo thei ṭhin hle.

Kohhran leh YMA ten an bawr deuh reng a, missionary te kan chawm ve a, buhfai ṭham pawh ka nuin a ip (bag) in a pe lo chauh tak tak a. A rem hriat vang ni hauh loin a sum an duh vangin eng pawl pawlah emaw hian supervisor a ni a, zirlai hruaitute pawhin a rukin a hmu fo.

Mi ramin 'citizens are first' an tih laiin a MLA puite nen chuan 'foreigners are first' an ti thung - a chhan chu an vote hmuhna ber a nih vang a ni. Sorkar ram, kan ram lo ni ta-ah pawh hian lo kan nei a, tuikhuah zau tak kan nei bawk. Phaiah min dah a, kan duh apiang min pe a, heng pawisate hi a hlawh aṭanga min pek a ni lo tih erawh tumahin an hre lo.

A department chan hnuaia officer-te nen chuan an in­kawmngeih hle a, ACB leh PRISM-in an thil tihsual an chhui pawhin a chawlhtir ngai lo va. Chanchinthara demna a nasat deuh chuan kar khat vel a hmingin a chawlh tir ve ṭhin. Hlawh a lak leh hlawh lak loh hian awmzia a nei ve vek lo a. Kum 5 dang MLA leh se kan tih em avangin in kan sa lawk duh lo a, a term hnihna aṭang chuan in kan sa ve ta a.

Ka pa chu M.L.A. a ni a, hnathawhna hun a nei vak loh avang leh a sum lakluh a tam bawk si avangin state-in leiba a ngah phah a. A M.L.A. pui te nena an tum a in an vek bawk avangin an rilru a buai thei hle a. Tin, ram han hruai turin college a chhuak ve tawk tawk a, zirna lamah thiamna teh chiam a nei hran lo bawk nen, ram dang kal a ngaih chang phei chuan aiawhin mi a tir fo bawk a. Mizoram aia mahni chawbel hmangaih zawk mipui a enkawl avangin eng tin tin emaw a tling ve leh nawlh ṭhin.

Mizoram state-in leiba kan a ngah bawk si avang leh thawhchhuah a lawi kan neih loh avangin mipui mamawh engkim a ti-sang a, an sawisel luai luai a, bang turin an ti bawk. Ka pa chu MLA a ni a, damdawi-in a awm changten a ei sen loh thilpek a dawng a. Inkhawmnaahte an ṭawngṭaipui a, mah se a piangthar dawn der si lo.

A lal chhung zawngin ram hruai ṭhat leh siam ṭhatna lam aiin chhungkua, laina, ṭhen­awm, party mi leh sa, a department chelh hnuaia offi­cer-te a duhsak zawk avangin a lo boral ta a nih chuan a zar zo hoin a hnathawh ṭhat an sawi luai luai ang a. Amah avanga Mizoram leiba ngahzia leh chhiatpui nasatzia tumahin an sawi lo tur hi a nupui leh a fate kan thla a muang lawk hle a ni.