Thaibawih nih zak lo Mizo mipate
Mizote hi hnam boral mai thei dinhmunah kan ding tia an sawi hi i lo hre ve tawh em? Eng vangin nge Mizo mipate hi kan thih zawih zawih mai le? Kan ramah mipate aia hmeichhia an tam zawkna chhan hi eng vang nge ni ang? Kan ramah hian Mizote hi awm ta lo ila, kan Zo tlang ram nuamah hian tute nge chenga i rin? Hnam dang ta ni turin Mizoram hi i phal em? Mizo hnam hi kan dinchhuah theih nan eng nge kan tih ngai le? Hawh teh u, Mizo mipate hian i ngaihtuah tlang teh ang u.
Kan pi leh pute khan tlang ram chhengche tak mai leh ram ngaw dur khup mai, ramsa hlauhawm tak takte chenna chu kan hnam tan an lo sat chhuak ve a. Chu mai pawh chu a la ni lo, anmahni rawn rûn ṭhintu hmelmate leh ramsa kawlhte’n an rawn beih reng bawk avangin inring renga an awm a ngai ṭhin. Rokunga'n ‘Doral hlau reng renga ram ṭuan nilênna’ a lo ti reng a.
Kan ram leh hnam a him theih nan chhungkuaah inrelbawlna fel tak an neih a ngai tih hriain, hmanlai Mizo mipate khan an mahni chhungkua ṭheuhah ro an rel a; mipate chuan an nunna thâp tak meuhin an nupui fanaute an venghim ṭhin. Tin, sakhuana thilah pawh Puithiam hna hi mipate chanpualah an dah a, hmeichhiate’n puithiam hna an khawih ngai reng reng lo. Chuti ni lo a, chhungkuaah hmeichia nu zawkin ro a rel zawt zawt chuan, chhungkuaa pa ber kha thaibawih tiin an hmusit em em ṭhin a ni.
Tunah hian Mizoram hi hmelma hlauhawm tak mai, ruihhloin min rûn nasa em em a, chhung tin min luhchilh mek a nih hi. Kan ṭhalaite rawn bitumin an thi zawih zawih a; a thi lote pawh chakna reng reng nei loin, ar pûl tur ang maiin an ṭhu ngui fur mai a nih hi. Khawiah nge Mizo mipa, nupui fanaute chhan nana nun thâp ngamte kha an awm tak le? Chhan tlak kan la awm e, tiin an au rawng rawng a, chhan chhuaktu zawngin chhanchhuahna in (home) nia an ngaihah an inhnawh luih luih mai a nih hi, chaw kawpuar leh in tur mumal pawh nei loin.
Ṭanpuitu an va ngai tak em. Mizo pa patling nupui fanaute chhan nana mahni nunna thâpa bei let ṭhin tan chuan awm mai maina chi a ni ta lo. I hrin ngei, i fa, ruihhlo ngai kha nangma’n enkawl leh ngaihsak miah loin, mi dang kutah i dah dawn em ni? Chu mai pawh chu a la ni hleinem, sakhuana thilah pawh, nuho a phusa nasa saah an ṭang tawh a, mahni in pawh uap lum hman lo lêkin pawn lamah rawngbawlin an vak chhuk ṭhin a nih hi.
Eng vangin nge, chhungkaw pa ber hi i ngawih reng a, i nupui fanaute pawh sakhuana thilah leh ni tin khawsakna thilah i kaihhruaia i thununa loh le? Mizo mipa i ni lo'm ni? in chhungkua in him loh kha. Kan ram leh hnam a dam nan i chet a ngai a ni, chhan a ngai a nih hi. Ka boral takngial dawn a lawm, Mizo mipa tan chuan awm mai maina chi a ni tawh lo e.
Mizo mipate zingah kan hnam hi boral thei mai dinhmunah kan ding tih pawh ngaihtuah peih lo, mahni chhungkuaah pawh rorelna kengkawh zo lo, fate ruihhlo bawia táng mek pawh chhanchhuah tuma thapui pawh thawh nachang hre lo, in chhung khura nupuite roreltir, an thu thua awm a, an duh dan dana khawsaktir mai mai, thaibawih nih pawh zak miah lo kan va tam tak em! Mizo mipate u, kan ram leh hnam chhan turin harhin tho thuai teh u.
- Hausanga Hauzel