Photography hi eizawnna a ni

March 17, 2015 Vanglaini chanchin­buah khan kan Mizo hmeichhiate leh kan photographer-te tana zahthlak tur khawpin thu thiam takin an rawn ziak a, a ziaktupa ṭhahnemngaihna kha ka ṭawmpui thiam loh lam a nih vangin photographer-te leh nula chhan hi ka mawhphurhna a niin ka hria.

Nula nalh tak i ni ta a, i ṭhatlai hun a rei dawn lo tih i hria a, engtikah emaw pasal i la nei thuai dawn tih i hriat bawk chuan mahni taksa mawina thlalaka phochhuah chu a pawina a awm em ni? Taksa nalh tak nei chuan 'show' hi an chak ve ang a, mi lep­chiah an nih loha hnu an taksa mawina thla­laka an phochhuak hi helh tur a awm em ni?

Mizo nula ṭhenkhat hi chuan camera hi an ngam mah mah tih hi chu ka pawm ve tho a, camera piah lamah a cameraman thlengin an ngam!

Kan inleng tlangval titi khawchang chu, "Hmanah chuan bike, tunah chuan camera ṭha hi nula sawm chhuahna ṭha ber," a ti mauh mai a, hetiang tawk lek Mizo nula in lo awm a nih chuan zah nachang hria ang che u.

Photographer-te hian a thlawnin thla an la lo. Nula thla an lak hi chuan hlawh an nei lo a nih pawhin inneih thlalak leh mitthi in, lungphun, jubilee lawm, birthday lawm etc ah hian sum tam tak an hai lut.

Inneih thlala thiam­te phei chuan ei­zawnna berah an hmang a, an camera man hi chu kar loah an hmu chhuak a, ei­zawn­na tlak a ni tawh.

Hemi piah lamah hian photographer-te hian kan ram mawi­nate hi khawvel hmuh­ah thiam takin an phochhuak a, kan tlang leh luite mawi takin an lantir a, an ṭangkai em em a ni. Nula thla an lak avanga photographer hmuh tleu hi kei ka phal lo a, nula hi chu thlalaka inlan lo pawh hi sawi kai tak hi chu veng tinin kan kawl hi mawle, tiin ka ṭang ve tlat dawn a ni.