Musical Concert nge Kût

Ṭhalai tan chuan a va nuam dawn em! Mahse Chapchar Kût kan tih kha a ni si a, tunah chuan musical concert, luh man awm lo a ni ta ber mai. Mizo kût ropui ṭhin kha a ni tih a la hriat chang chang a ni e.

Chapchar Kût kan hmang leh ta a, ṭhalai, concert lawm tan chuan a nuam viau a ni thei e, concert lawm tawh vak lo tan chuan a hlut dan a hlu tâwk ta lo hle mai. Chapchar Kût kha tunah chuan open air concert ropui takah a chang ṭan mek a, hei hi chu a kalhmang chiah lo.

Zaithiam zaitir loh ringawt tur chu a ni miah lo ang, tunlaiah chuan mi hian zaithiamte kan ngihlu thiamin, kan zaithiamte an thiam tawh hle bawk a, sound kan nei ṭha tawh bawk nen, boruak tinuamtuah chuan a ṭha viau a ni. Amaherawhchu tuna kan kalpui dan luai luai hi chuan mi a hîp lo zawk ang tih a hlauhawm a ni.

Hnam dang leh ramdang aṭangin mi tam zawkin min rawn hmanpui se kan ti a, theih ang tâwk tâwkin Chapchar Kût nuam lehzual leh, Mizo lehzual zawka kan hman theih dan tur hi ngaihtuah a ṭha a ni. Concert anga hun hman a, mahni duh duh dana lâm luai luai kan duh a nih si chuan Chapchar Kût buatsaih lo hian, musical fest buatsaih ta zawk ila, a dik zawk a ni. Chapchar Kût hi musical fest a ni lo a, hnam kût leh ni pawimawh a ni tih hi kan theihnghilh palh mai ang tih a hlauhawm.

Mizo lehzuala hun kan hman a, kan hnamzia, tuna kan chîn tawh ngai lohte a tam thei ang ber kan phochhuahna remchangah kan hmang thiam lo nge, chutiang ai chuan mipui kan lâm luai luai kha an duh zawk tih pawh hriat thiam a har. Hnam nunzia tarlanna hunah hian western culture leh musical style bawk kan pho chhuah leh si chuan Chapchar Kût hi eng nge a hlutna ni ang a, eng nge a hlawkna ni ang?

Mipui kalkhawm nuam tihzawng ringawta kalpui tur a ni lo a, mipui hruaia awm rikngawt hi a dik lo.Ngaihtuahna hman peih tawk loh vang a nih te pawh a rinawm e. Kan hnam tana ṭha tur, hnam dangte pawhin kan hnam nunzia an hmuhna tur a nih laiin, an hriat ṭhan leh an ngaihthlak ṭhin ang bawk kan hlui chuan, min hmanpuitu leh rawn chhimtute tan eng ang hnam nge kan nih a hriat chuang nang le.

Zaithiam hrang hrang an zai a, Pathian fakna hla leh lenglawngte pawh inang khata an sak mai kha a zia lo lam deuh chu a ni. Fakna hlate hi kan roh thiam deuh chu a ngaiin a hriat. Fakna hla ṭha tak an sa zo chiah a, lenglawng ngialngan lutukin a chhunzawm leh nghal chat a, mite rilruah Fakna hla hian Fakna hla a nihnaa hlutna a neih tlem phah ang. Pathian kan fak nge, hlimhlawp kan bawl tih pawh hriat hran a, khati lutuk lo deuh khan, gospel singer-te pawhin khatiang hunah kha chuan ram leh hnam hla emaw talte sa ta se, a ṭha zawk ang.