Gas home delivery a ṭha

Hun eng emaw chen aṭang khan cooking gas home delivery hi Aizawlah tih ṭan a ni a, College Veng chu a ti hmasa niin ka hria. Veng hrang hrangah an ti mek zel a, a awlsam khawp mai.

Hmân ang khan, 'Chumi point-ah chuan gas a lo thleng dawn a, a la duh tan lak theih a ni ang' tia vantlang aurina hman ngai tawh lo veng tam tak an awm a. Chutihlai chuan veng eng emaw zatah chuan an la au a, hun leh tha sêngin an gas an tlar a, rei tak tak an la nghak ta ṭhin a. Chutiang ti tawh lo veng chuan awlsam takin gas an lei tawh a ni.

Mizo hi thil ṭha intihhmuh kawngah kan la hnufual hle. Veng ṭhenkhat home delivery duh miah lo an la awm a, khawtlang hruaitute pawhin an hmin kim hleih theih loh khawpa khirh veng an la awm nawk mai. Home delivery tihna veng chu nuamsa tawh tak kan ni.

Keini vengah chuan Vanbuangi Gas Agency area kan ni a, home delivery hi kan ti hma lutuk lo. Mahse kan tih chinah chuan a nuamin a awlsam a, tha leh zung sen a ngai ta miah lo mai a, gas phurh man (mutia hlawh) Rs. 70 kan lo pe mai a, chhung tin kan awlsam phah em em tawh a ni.

Vanbuangi Gas Agency hi an fel ve hrim hrim bawk. Customer an care hle. Group an siam a, gas online-a book chu a lo thlen hma ni-ah 'Gas a lo thlen chuan naktukah kan rawn deliver dawn e' tiin Whatsapp group-ah an puang a, khata hming langte chu an in chhung lumah pawisa nen an lo inring mai a, awlsam tak a ni.

Mizo tlangval ngat gas pe kual turin an ruai a, khang an mi chhawrte khan chawhma chhung lekin Rs 1,000 velte an hlawh niin an sawi a, mahni hnam hmangaihna dik tak ni pawhin a lang. An fakawm ngawt mai. Gas leitute pawhin vai ai chuan mahni hnampui pawisa pek kha nuam kan ti fe zawk.

Vanbuangi Gas Agency hi Mizoramah a hmasa ber pawl a ni a, sawiselna pawh an tawk ve viau ṭhin. Kei ngei pawhin consumer card Rs. 20 man tur Rs. 50-in mipuiah an pek vangin consumer court ah ka khing a, a rate ngaiin an pe ve leh mai a, min haw zui lem lo. A neitute rilru a zau a, an fakawm khawp mai.

Sawi tak angin veng ṭhenkhatah chuan home delivery hi a la sak tlat hi chinfel a ṭha khawp mai. Kan kawng a zîmin hmun âwl kan nei tawh mang si lo a, kawngpui a tichêp em em tawh. Home delivery a nih chuan mipui tan leh agency tan pawh a awlsam hle a ni.

- Lal Rinmawia