Chenna in hlutzia hi

Kan naupan deuh lai, high school kan kal ṭan kum khan kan headmaster Pu A Sawihlira (fam ta) khan a sikul naupangte kha sikul zaipawlte dinin, hla chi hrang hrang min zirtir ṭhin a. Chuta hla min zirtir pakhat ka rilru a la cham reng mai chu ‘Home sweet home’ tih hla kha a ni. Kha hla kha chenna in hlutzia thu sawina a ni ber a. Lal in ropui takahte chengin, nuam tin tawlin han awm vel ṭhin mah ila, mahni in, tlabal rim rem mah ni se la, a ang tluka hlu leh ngaihawm reng a awm loh thu sawina a ni ber. Kan headmaster Pu A Sawihlira khan kan hriat loh a hlau bawk a, Mizo ṭawngin a let a, chungte thleng thleng chuan a hlain kan sa ṭhin. Kan zir hun lai kha chuan kan sa liam mai mai a, a hlutna leh a awmzia vak pawh kan la hre pha lo a ni ber awm e. Kan upa telh telh a, chenna in hlutzia leh pawimawhzia kan hre nasa tial tial a, kan thinlung lairil luahtu ber leh muanna ber pawh kan chenna in a nihzia chu kan hre chiang tial tial zawng a nih hi!

Khualzinte’n kan han chhuak a, khawpui lian tak tak leh hmun ropui tak takte kan han fang a, chenna hmun nuam tak takahte kan han thleng ṭhin. Mahse, chutiang hmunah pawh chuan rilru a muang famkim thei lo. Ṭhiante nen nuam ti takin, hlim takin han cheng ho ṭhin mah ila, a tawpah chuan mahni in bawk a ni kan rilru luahtu ber leh kan ngaih ber a, hâwn kan châk lehna ber ṭhin chu!

Mahni sum seng hauh lovin, sorkar sum vek hmangin, khawpui lian tak takahte han theuleuin, hotel changkang ber berahte thlengin, nuam tâwlin han awm vel ṭhin mah ila, a tawpah chuan mahni in bawk a ni kan ngaih leh ber ṭhin chu! Kan chenna in chu chhe tak, tlabal rim rem pawh ni se kan thinlung zawng zawng luahtu ber leh kan thlakhlelh ber a ni tho tho ṭhin.

Inah han hawng ila, kan zawhna hmasa ber leh pawimawh ber chu, ‘Khaw nge ka nu?’ tih a ni ṭhin. Chuvangin, kan nu leh pate’na min lo chawi seilenna, kan in ngei hian kan thinlungah hmun pawimawh ber a luah tlat ṭhin a lo ni! Pa ber pawh a lêm chuang lo! Khawi lo han kal se, a lo hawna a zawhna hmasa ber chu, ‘Khaw nge i nu?’ tih a ni ve tho ṭhin. A dawt leha an zawhna thin chu, ‘Khaw nge ka pa?’ tih hi a nih leh ziah. Nu ber khawilo kal pawh a lo hawna a zawhna hmasa ber chu, ‘Khaw nge i pa?’ tih a ni ve leh tho bawk.

Chuvangin kan chenna ina a lairil luahtu ber chu kan nu leh kan pate hi an lo ni chiang hle tih chu a chiang hle awm e. Kan sên lai aṭangin kan chenna inah ngei hian kan nu leh pate’n duat chi tinrengin min pawm sei lian a, thu chhia ṭha zawng zawng min hrilh a, an ei ai thil tui leh ṭha zawng zawng min pe vek a. Thu chhia ṭha engkim, kan tana hriat tur awm ang an hriat apiang min hrilhin min zirtir fai vek a. Kan sikul hmasa ber leh kan inzirna hmasa ber chu kan chenna in ngeia kan nu leh pate’n min zirtirna hi a ni.

Kan chenna in hi engakima kan himna ber hmun a ni a, naupan lai pawhin kan ngam loh velh kan tawn dawna kan tlanchhiatna ber hmun a ni ṭhin. Hmanlai aṭang tawhin chenna in hi chhungkaw rorelna hmun ber, thu chhia ṭha engkim chhungkuain kan relna ber hmun a ni. Hetiang thu ka han sawi deuh duahna chhan pawh, hman ni deuh khan ka tupa, nausen tê mai, kum khat leh thla sawm mi lek, ṭawng pawh la ṭawng thei lo hi a khua a sik avangin damdawi inah kar khat chhung a awm a. Amah hi nausen ṭap duh lo tak leh fel tak mai a ni a, a nu tak chu damdawi in liana enkawl mek a nih avangin a nutei’n (a pa nau nupuiin) a awmpui mai a. Chawlhkar khat dawn lai a awm hnu hian dam takin an lo chhuak ta a. In an lo thleng a, kawngka a lo lut chiah chu a va han lungmuangin a va han hlim tak em! Inah hian keini, a pi leh pute chauh kan lo awm a. Kawngka a lo lut chiah hi a hmel leh mitmengah thlamuana famkimin a thlamuang tih a hmuh theih a. Chhuat laiah hlim em emin a tlan kual vel a, han en reng reng khan eng mah dang lungkham a neih hmel loh hle a ni.

Heng naupang tê mai, nausen anga kan la ngaih thleng pawh hian mahni chenna in chu an lo thlahlelin an lo va thlamuanpui tak em. Chuvangin kan chenna in ngei mai hi ngainain thlahlel vek ila, a tihlutu ber kan nu leh pate pawh zahin an thu awih tum vek ila. A chhunga cheng chhungkua pawh inngeihin, zai inngai tawn ila, chhungkaw nuam leh chenna in nuam i siam vek teh ang u. ‘Home, sweet home, there’s no place like home,’ tih hi hlim taka sak i tum vek teh ang u.

- Patrick Z, Chhingchhip