Doctor NPA tihtawp a ngai

Mizoram sorkar chuan sorkar hnuaia thawkte chu an hna bak an thawh loh nan Non Practising Allowance (NPA) chu kum eng emaw zat kalta aṭang khan a pe a, tunah hian tihtawp tumin ruahmanna a siam mek a, a tihtawp ngei pawh a ṭul khawp mai.

Central sorkarin 7th pay a siam khan NPA hi doctor zawng zawng ni loin, clinical doctor-te chauhin an sorkar hnathawh bak private clinic an neih loh nana a pek tur a ni a, Mizoramah chuan doctor zawng zawngin an la a, doctor pakhat chauhin a la ve lo ni awm tak a ni.

NPA la tur ni si lo, sorkar pawisa thla tin la hi an tam hle a, MBBS an nih phawt a, sorkar hnuaia an thawh chuan an la vek mai a, hei hi a dik thei lo hrim hrim phawt.

Doctor, Damlo enkawl thei chin (clinical doctor) chutah pawh sorkar damdawiin leh PHC emawa thawkten an enjoy tur a ni, chutah pawh pawn lama damlo en a thiang lo reng reng.

Chuti ni si, eng vangin nge director leh a aia sang, sorkar doctor ten he NPA hi an lak vek ni le? Damlo en thei chin ni lo pawhin doctor dek dek tawhin an la hi thil dik a ni thei lo. Dan a awm a, chu dan chu an zawm tur a ni. Kum eng zat tak NPA hi lain sorkar sum ei hlawm tawh ang maw?

He thil hi chhui chian a ngai ta hle mai. ZPM sorkar tharin a rawn chuk chat pawh hi a dik khawp mai. A bul berah chuan doctor-te an ni lo tih a chiang. Finance lamin 7th pay an en uluk tawk loh vang a nih hmel. A mawh chu finance department an nih hmel.

Chuvangin he NPA hi tihbo ngei ngei a ngai. Mipui sum doctor ten an fanghmano ei ṭeuh ṭeuh bik hi kan phal tawh bik lo.

- Lal Rinmawia