MIZORAM PWD, AIZAWL ROAD NORTH LAMTLUANG

Kamkeuna: Kawng ṭha kan duh, Aizawl leh Mizoram chhung mipui te hian kawng ṭha tak neih ṭheuh kan duh. Kawng enkawltu leh siamtu Mizoram PWD te pawhin chu chu an duh ṭheuhin a rinawm. Kawng ṭha nei turin Aizawl leh Mizoram hmun tam taka khawthlang te chuan tha an thawh a, PWD te hna an thawpui a, kawng enkawlnaah pawh nasa takin an thawk tih hi thu hriat nuam a tling a, Pulpit tlang meuha sawi atan pawh a awhawm ngawtin ka hria!

Mizoram Journalist Association-te ngaihdan

I&PR/NIB, Media Cell leh Mizoram Journalist Association-te chuan ni 22.5.2016, Zirtawpni khan Aizawl Road North PWD hmalakna, Vaivakawn to Chawlhhmun, Leitan to Durtlang North leh Beraw tlang panna kawng te an tlawh ṭuma an thil hmuh leh hriat te hi a ngaihnawm bakah a hmuhnawm tel bawk. Veng ṭhenkhatah erawh mi
ṭhenkhatin kawng leh a vel an zah loh dan erawh a lungchhiat thlak hle thung.

Hmun ṭhenkhatah mimal ten sawrkar an zuamzia an hmuhin mak an ti a, vantlang kawng enkawlna an pawisak lohzia an hmuh bakah, mahni mala thil tih vanga kawng ṭha lo, kawng chhia a tam phah hle tih an hmu a, Mimal in hmun leh ram laih vanga kawng nasa taka a chhia chu demawm an ti hle.

Kawng ṭha duh si, bungrua leh lirthei kawngpuia dah lui tlat te, bawlhlawh leh leivung kawngpui kama paihin leimin a siam nasatzia te, Culvert hnawh pin leh Side drain chhilh ta daih te avangin tui hawk kawng bo kawngpuiah a luang a, kawngin a tuar a, kawng siam a tlo thei lo. Tunhnaiah PHE lamin hmasawnna tam tak an nei tih an sawi a, mahse khawpui chhung tui semna pipe an enkawl danah tuihawk luankawr vela an tui pipe kalin side drain a hnawh vanga bawlhhlawh a dan ṭhin avangin kawngpuiah tuihawk a luang nasa a, khawpui chhung veng hrang hrangah chu chu kawng chhiatna pakhat niin an ngai a, thuneituten enfiah vat ni thei se an duh, tih an sawi bawk.

MJA te chuan sawrkar department hrang hrang puanzar leh mipuite hriattir tur awm ang angah Media hmang ṭangkai thiam se, an hnathawh leh harsatna, mipuiten hria se an tih ang te chu sawrkar hmalakna puang zartu Mizoram Information & Public Relations Department hnenah thlen thuai thuai se, TV leh Chanchinbu lamin I&PR thuchhuah chu an ngaih pawimawh ber a nih reng thu an sawi a, Mizoram department zingah kum khat chhunga thla 13 hnathawk an awm tih sawiin, PWD department chu thla sawm pathum duty nei, thla sawm pahnih hlawh la an nih thu MJA-te chuan an sawi.

Kawng chhia a ṭha

Vaivakawn leh MZU inkar kawng ṭha lo avang hian a paltlang veng mipui, MZU zirlai leh hnathawk te, supply thiartu lirthei-te pawhin harsatna an tawk nasa hman hle a. Mipui te harsatna hriain Mizoram sorkarin sum tam tak bain he kawngpui siam hna hi a thawh chhunzawm ta a ni. Tunah hian he kawng pawimawh tak hi siam zawh a ni ta.

Vaivakawn leh MZU inkar kawng hi Km 10.5 a thui a ni a. Kum 2014 aṭang khan JNNURM sum cheng vaibelchhe 19.64 hmanga thawh a ni a, UD&PA depart-ment chu Nodal Depart-ment niin MPWD chu Imple-menting Agency a ni a, sum hman danah fel taka inkaihruaiin Independent Review & Monitoring Agency siamin Central-ah report an pe ṭhin a ni. Harsatna awm zingah JNNURM a tawp tawh avangin contractor hlawh pawh hi PWD Road North hian an la ba ṭhen zawk a ni.

Aizawl Road North Division hian hun rei tak siam zawh theih loha awm Zonuam leh Tuivamit inkar pawh siam zo tawhin, hemi bakah hian Aizawl Road North Division te chuan Luangmual khaw chhung kawng km 3 vel leh Chawlhmuna PWD kawng awm zawng zawng pawh University kawng an siam pah hian an siam tel nghal vek a ni.

Leitan aṭanga SOG Camping Centre inkar BRTF kawng Km 3 chuang hreta thui zauh leh black topped te leh side drain Km 1.30 zet a thui siam hna hi thawh mek a ni a. He kawng hi kawng pawimawh tak ni mah se kum 1985 aṭanga VC/LC leh NGO ten khawtlang hnatlanga kawngpui zauh leh siam, tun thlengin kum 30 vel zet chu he kawng enkawl hna hi khawtlang hnatlang tein an la thawk a, he kawng siam hna hi PWD chuan zawh thuai an beisei.

Entawn tlak Durtlang, Luangmual, Chawlhhmun, Zonuam leh Tuivamit khawtlang

Mizoram University kawng-pui siamnaah hian a paltlang veng te leh a chhawrtu veng hrang hrang ten Joint Action Committee dinin nasa takin he kawngpui siam ṭhatna tur hian hma an la a. Kawng siam hna thawh chhung leh a hnu thlengin khawtlang mipui ten he kawngpui atan hian tha leh zung tam tak an thawh tih PWD hotute chuan an sawi a, hnathawh a nuamin an
ṭawiawmna zarah kawng siam hna chak takin an thawk thei tih an sawi.

Heng vengte hian an Veng chhung kawngpui pawimawh humhalh leh enkawl turin Traffic Management Commi-ttee-te dinin, zanah kawngpui dungah motor riah an phal loh bakah chhunah kawngpui metal chinah motor engmah hun emaw dah emaw an phal lo. Kawngpui kama awm reng rengin an in
aṭangin Kawngpuia tui paih leh luantir an rem tih loh bakah eng motor pawh ni se kawngpuia sil an khap a, kawngpui humhalh tura inzirtirin veng chhung YMA chanchinbu-ah kawngpui humhalh pawimawhna leh ngenna thu an chhuah ṭhin.

PWD Aizawl Road North 2015-2016 hlimthla

MPWD, Aizawl Road North Division hian kum 2015-2016 chhungin kawng laih zau hna 0.066 an thawk a, 4.654 kms pavement siamin, resurfacing 2.850 kms an nei a, retaining wall, side drain leh kawng patch repair 57.678 hna an thawk zo bawk. Black topped kawng hi Km 178.551 thawkin, Kachari road (Earthen road) Km 45.589 zet an thawk zo bawk. Tuirial leh Sihphir kawng bakah Aizawl khawpui hmar lam kawng zawng zawng hi Aizawl Road North Division enkawl vek a ni a, a vaia an kawng enkawl thui zawng hi Km 224.740 zet a ni.

- Lalrochhara Chhakchhuak