Kan leh ngaihsan ta si!

"Hman deuha eiru eiru kan tih kha a hausak hnuah kan leh ngaihsan a, hman deuha engmah pawh ni lova tuna hausa ta thur thurte pawh hi an pawisa hmuh danah ringhlel mah ila kan leh ngaisang ta si a, Mizote hian sum nei apiang kan ngaihsan avangin Vairama gunda culture-ah hian kan lut ṭep tawh ang," tiin ṭhianho ti tinaah ka sawi chhuak a, kan sawite hi an hmingin ziah chhuak remchang lo mah se a thuphungin (general) ziah chhuah hi a bata ka bat niin ka hria.

Mizote hian eng ang mi nge kan ngaihsan? tiin lo inzawt ta ila, kan chhanna tur chu 'Mi dik, mi huaisen, mi thiam, mi taima, mi rinawm, mi in-ngaitlawm, mi thilphal, Pathian ṭih mi.... etc' tiin kan chhang ang. Heng quality ṭha tak takte hi a thuphung chuan kan ngaisang a, amaherawhchu tunlai khawvela kan ngaihsan ho hi chu an ni lo.

Tuna kan ngaih-sante chu mi hausa, mi inti lar thiam, mi zakthei lo, mahni hnathawh puanzar tuma taima leh zak thei lo, mi tlawn thiam, pawisa hmuhna rinhlelh kai aṭanga midang tana pawisa pe chhuak phal, an zik chhuahna chhui tur awm lo, tunhnai kum 10 vela hausa thut, intihlarna a nih phawt chuan sorkar mi liante tlawn huam huam chi an ni.

Vairamah chuan sum hi an pathian biak a, sum an neih theihna tur a nih chuan thil chhe deuh deuh tih an hnial lo. Sum an neih hnuah chuan power an ngah tawh a, sorkar-ah pawh sawi nei phak khawpin pawisa an ngah tawh a, sorkar hotu liante nen an inthu rual thei tawh a, a tawpah phei chuan misual rual (gunda) lam ṭangah siamin an anmahni hnial kalh leh sawiseltute leh an rival chu gunda-te hian tharumin an khawih mai a, an that hial ṭhin tih kan hre awm e.

Tuna Mizorama kan mi hausa leh lar ṭhenkhat hi chuan Vairam culture hi an hlat tawh lovin ka hria a, pistol leh silai ṭha leh man tote hi an kawl fer fur tawh a, nakin lawkah chuan thu neih inchuhna leh sum inchuhna avangin gunda hial hi kan la rawih ka ring a, kan hausate hausak danin a zir loh avangin kan ke chheh hi a dik lo.

Tun hma aṭanga sumdawng aiin tunhnaia mi an lian thut a, tun hmaa contractor aia ṭhang chak an pung thur thur a, sorkar officer ve mai leh officer bang ve maite an hausa a, rethei leh hausa inkar a zau. Heng mite kan leh ngaihsan lawi si hi chu kan ram chet sualna lian ber a niin ka hria. Ṭhangtharte hian in ngaihsante kha kum 10 kal ta khan tu nge an nih lo chhui teh u. Aizawla piang leh sei lian ka ni a, hausak dan dika hausa chu ka hre ve a, an lian thut ngai lo.

- Mamawia,

Aizawl (original)