ENGTIKAH NGE I PIAN?
Hnam dang chu kan sawi thei lo ang a, Mizote bikah hian kan pian kum dik tak ‘Birth Certificate’ a dah hi engzat nge ni ang aw tih hi ngaihtuah tham niin a lang. Fir leh fet takin han in ‘check’ ta ila, tuna hna ṭha tak nei, kohhran leh khawtlanga mi pawimawh leh zahawm tak takte hi an kum a over tawhin an hna
aṭanga pension hun tawh mi tam tak an awm mai lo’ng maw?
Mi ṭhenkhat chuan kum hnih thum te in kan pian kum kan sawn tlai ta dawr ṭhin a, a zialo hle. Kan pian kum chung changah hian khawpui mifing fate aiin thingtlang naupang mawl zawk nia kan hriatte pian kum hi a dik zawk ngei ang. Pawl sawm exzam dawnah kan pian kum aia kum thum emaw vela naupangin kan han in ziak ta ngawt a, chuti ang chuan kan document zawng zawngah kan pianni siamtuin min pek kum chu ziak dik loin kum hnih/ thuma sawn tlaiin kan dam chhung kan han hmang zo ngawt mai tur hi chu min Siamtu kan tawh hunah a zahawm duh dawn mang e. Dikna leh rinawmna duh Pathian betu kan ni si.
Kohhran hnuaia hna thawkte zingah pawh heti ang mi hi kan lo awm a nih chuan Pathian sum chu kum hnih thum, kan pian kum kan ziah dik loh zat zelin kan eiruk sak char char a ni a. Ngaihdam dilin Pathian hnenah kan ṭawngṭai ngai em? Mahni lam fel hmasa zet si loa midang fel tura nawr luih hi a ni lawm ni Lal Isua’n mahni mita khanchhuk awm hmu si loa mi mita hmawlhte awm hmu a tih te kha? Vanrama Pathian hnena chatuana chawl tur Kristian kan nih avangin dikna hi kan theih chin chinah kan nunpui tur a ni a, chumi tur chuan Lal Isua pawh hian min zirtir a ni.
Kan dikna vang leh kan rinawmna vanga Vanram kai tur chu kan ni hauh lo. Vanram kai tur erawh chuan kan dik a kan rinawm a ngai a ni -kawng engkimah.
Tunah chuan Sorkar pawhin kan pian kum a la uluk tawhin kan duh hun hunah kan pian kum kan sawn thei tawh dawn lo a, a lawmawm hle. Pathianin kan pian ni leh kum fel leh dik thlapin min ruatsak a, chuti chuan mi pangngai kan ni a, he khawvel hi nuam ti takin kan chen theih phah a ni. Lawmthu sawi mawlh mawlh tur kan nih laia kan han zep a kan han sawi dik lo ve ringawt hi chu - Anania leh Saphiri te anga kan boral nghal loh avang hian lawmthu sawi mawlh mawlh tur kan ni!
Tun aṭang chuan kan pian ni dik takah kan piang tawh a, kan thihniah pawh kan kum dik tak nen kan thlanlung an lo chei thei tawh dawn a ni. Kan thlanlung lehzelah pawh dawt an ziah chuan kan inbum hlum ṭhak tihna a ni dawn a, Setana’n phur takin min lo welcome ang tih a hlauhawm e!
Chuvangin, kan lo ti dik lo a, kan lo tisual a nih chuan ngaihdam dil ila, kan bula mi te pawh dik taka awm turin i zirtir ang u. Chuti chuan khawvelah leh Lal Isua-ah kan pian ni dik takah kan piang ang a, tisa leh thlarau-ah mi pangngai kan lo ni ang.
- Rinfela Zadeng