Industry leh Trade & Commerce Amalgamation

Tun hnai mai khan Mizoram sorkar chuan department pahnih Industries department leh Trade & Commerce department chu department pakhatah a kaikawp tih an puang a. Sorkar meuhvin hetia 'amalgamation' a tih chuan chhan tha tak a awm ngei ang tih a hriat theih a. Central ministry lamah "Commerce and Industry" tih a ni a, India ram state dang zawngah pawh "Commerce and Industry Department" tih a nih zel avangin kan ramah pawh tih ve ila a tha ang, tih vang ringawt chu a nih ka lo ring lo ngawt a. Sorkarin hetianga thutlukna a siam ta rau rau a nih chuan kan ram tana thil kalphung siamthatna remchang a ni thei mai ang em tih a ngaihtuah theihin ka hria.

Dik tak chuan Industry leh Trade & Commerce hi kal fuh ila chuan kan ram economy siamthatna hnukpui a ni a. Entrepreneurship chawikanna atana a kailawn pawimawh pahnih an ni. Mahse, kan sorkar kal tawh zawng zawngte'n he department pahnih hi siam lian a, mipui chhawr theih dan tur ang bera siam tumna kawng an la nei lo emaw tih mai turin ngaihpawimawh a hlawh ngai lo. Industries department ngat phei hi chuan Director thar hi an han nei zing khawp a. UT kan nih atanga vawiin thlengin Director 23 an nei tawh a. Tunhnai kum 20 chho phei hi chuan an director tam zawk hi thla 3, thla 6, kum khat tih vel an awm a, an sawn zel a. Ka hriatsual loh chuan Industries Director ni rei ber chu Pu Laima Chozah IAS kha a ni a, kum 3 term a hmang zova. Sorkar officer lianho posting siamremna "Transit post" ang mai ni ber hian a hriat thin. Hna an thawk hman meuh lo a ni ber.

India sorkar, central ministry lam kan thlir erawh chuan subject pawimawh ber pakhatah an hmang chhova. UPA sorkar hmasa UPA-1 khan Ministry of Small Scale Industry tih thin chu Ministry of Micro, Small & Medium Enterprises (MSME) tiin a thlak a. MSME Development Act 2000 ang phei chuan Industry tenau ho reng reng chu "Enterprise" tiin an thlak a. 'Industry' tih tawngkam phei hi chu thilsiamna lian tak tak chauh sawi nan an hmang ta deuh ber a. An investment a zirin 'Micro/Small/Medium Enterprise' tih an hmang ta ber a ni. India ram atanga ramdanga thil thawnchhuah (export) hi zaa 45 lai industry tenau (Micro & Medium Enterprise) te thawhchhuah a ni tih hria-in duhsakna tam tak a dah chhova. Ministry hrang hrangah entrepreneur-te duhsakna scheme pawh chi 142 vel an duang chhuak hial a.

PM Narendra Modi lo lal hnu, NDA sorkar phei chuan an flagship policy-ah "Make in India" programme a rawn hmang chhova. Hemi hawi hian Ministry tinin an programme an siam tha a. Awlsam zawka entrepreneur te'n loan an hmuh theih nan MUDRA scheme te an siam a. Ministry of Entrepreneurship & Skill Development te hial an siam ta a ni. India ram hi khawvela thilsiamna hmunpui (hub) atan an ruahman mek a nih hi. Dik tak chuan Agriculture a ni emaw Fisheries a ni emaw Horticulture a ni emaw ram economy siam nana an tinzawn vek chu pawisa leh hlawkna siam a ni a, entrepreneurship zel kha a hmawrbawktu, a sum channa lai tak a ni. Chumi kawng kan zawh theih nana tualchhung thilsiam chawikanna chu Industry department lam tum tur a ni a, Commerce Department-in tualchhung leh ram pawn lam nena kan insumdawn tawn theih nan hma an la ve thung ang a, mipuiin kawng zawh tur kan nei dawn a ni.

Sorkar thuneitute chuan engkim hmu lawk sa vekin hma an la ang tih chu a rinawm. Keini, mahni vei veia he lam kawng lo vei vetu chuan thil thlir dan chi hnih kan nei a. Pakhatnaah chuan kan ram siamthatna leh economy chawikanna tak tak turin ruahmanna an nei a ni thei. Pahnihnaah chuan central leh state danga an tihdan a ni a, department lian tak a ni ang a, kan duhsak zawng Director-ah kan dah thei ang, tih vel emaw mai mai a nih chuan a pawi khawp ang. A beidawnthlak viau bawk ang. A hre ber leh a thiam ber chu ka ni hauh lova. Mahse, kum engmawzat kalta atanga kan rilru kan lo pekna, state chhung leh pawn lam thlenga ngaihtuahna kan lo sen ve tawhna subject a ni ve a. Kan ngaihdan leh tha tur nia kan hriatte tlangaupui a, sorkar beng thleng tura puanzar ve hi khua leh tui rinawm kan nih anga kan tih ve tur a ni a. Rawtna siam ve ka duh a ni.

"Commerce and Industries Department" hi alo ding ta rau rau a nih chuan Principal Director emaw Commissioner pakhat hnuaiah awm sela. Industries Director hi IAS cadre post tih a nih tho avangin IAS fel tak tuemaw chu lo awm ta pawh nise. A hnuaiah Director - MSME & Entrepreneurship Deve-lop-ment te, Director - Commerce & Foreign Trade te, Director - Hnadloom & Handicraft Development te awm ta se tih hi ka rawtna a ni. Chutiang tura ka rawtna chhante chu:-

1. Central ministry, kan pawisa hmuhna tur berte dawr dan kawng a fel thlap ang. Mizoram mipui mamawh a phuhru thei bawk ang. A kalphung a ‘professional’ tawh ang a, officer ten mipuite tan an 'deliver' tha thei tawh khawp ang.

2. Department pahnih amalgamate te hi mahni puala office building hran ve ve nei tawh, staff engkim nei fel ve ve tawh an ni a. Sorkar-in sum leh pai senbelh mang hauh si lovin hna an insem fel thlap ang a, kalphung mumal a neih theih phah ang.

3. Hun rei tak head of department puitling lo ni tawh si, department pahnih suihfin avanga second door posting han chelh leh daih chu a tlawmngaih thlakin phur taka hna thawh zui a har ngawt ang. Chutih rual chiah chuan Industries department-a officer tam tak hi an dam chhunga Director ni lo tura hna han thawh reng mai chu phur a har khawp bawk ang. Hetia Director pathum kan dah chuan mi tam takin Director nih theihna chance an nei dawn a. Hna an thawk phur zual sauh dawn a ni.

4. Director - MSME & Entrepreneurship Deve-lopment chuan Mizo thalaite entre-preneurship training pek, micro-enterprise dinna tur kawng zawnpui, central scheme Mizorama hman theih ve tura hma lakte chak takin a kalpui thei ang.

5. Director - Commerce & Foreign Trade chuan state dangte nena insumdawn tawnna bakah kan thenawm foreign ramte nena insumdawntawnna lamah insawrbingin "Look/Act East Policy" lamah insawrbingin Ministry lama Commerce & Industries bakah External Affairs Ministry a thawhpui thei lehzual ang.

6. Director - Handloom and Handicrafts Development chuan Ministry of Textiles leh a hnuaia handloom and handicratfs agency hrang hrangte thawhpuiin thuneihna sang tak nen hna a thawk ve thei tawh ang.

7. Chu'ng Director pathumte chu Principal Director emaw Commissioner pakhatin a enkawl ang a, coordination a mumal ang a. ‘Trinity’ ang deuh, thil chi thum, chi khat ni si. Thil chi khat, chi thum ni si alo ni tawh ang a. Hma lakna a kal khat thei dawn a ni.

Sawi tur tam tak ala awm thei awm e. Tun tum atan chuan duhtawk phawt teh ang.

(Send your feedback @9862566772 or mail me at joseph_ralte@rediffmail.com)

Joseph L. Ralte