NLUP hlawhtlinpuite

Congress sorkar inzawrhna NLUP hi TV-a NLUP fakna velah hian a hlawhtlin hmel hle. Chhungkaw tam takin pawisa an dawng a, hlawkpui tam tak an awm a, eizawnna nghet neih phah tam tak an awm a ni an ti. Hlawhtlinpuite chu NLUP an fakna velah te an tilang ṭhin. Mahse NLUP hlawh-tlinpui nia an tarlan tam tak hi NLUP an sem hma aṭang tawh lo thawk tawh an ni.

Ka hmelhriat pakhat chu NLUP hlawh-tlinpui an tarlante zingah a rawn lang nawlh mai a, an sawi dan chuan NLUP avang liau liaua hlawhtling a ni. Amah ka hriatna a lo rei ve tawh a, NLUP an sem hma aṭanga eizawnna bul ṭan a, dinchhuah tuma taima taka thawk tawh a ni. Congress-in NLUP an sem hma khan a eizawnna chu a nih tur ang a ni hman tawh a, NLUP an sem a, pawisa a dawn kha chu eng tham mah a ni tawh lo zawk a, a eizawnna thil bungraw pakhat, a neih loh pawha a buai phah em em loh lei nan a hmang a ni.

Bawng vulhtu pakhat pawh NLUP avanga hlawhtling angin party hruaituten an sawi a, mahse amah kha ka mi hriat sa a ni a, NLUP avanga hlawhtling a ni lo, ama taimak rah a têl a ni tih ka hrechiang hle si. NLUP an sem hmaa bawng lo vulh tawh, ṭheka pawh lo nei tawh a ni.

NLUP hlawhtlinpui tak tak an awm ngei ang, mahse engati nge NLUP avanga hlawhtling ni lo, anmahni thawh chhuah liau liaua hlawh tling, a hnua an neih belhchhah nana NLUP dawng ve ta chauh zawkte hi NLUP hlawhtlinpui tia dawt kan sawi mai ṭhin le ka ti. Nge, NLUP hi hlawhtlinpui tak tak an awm lo a, entirna pek tur an hriat loh avangin dawt an sawi mai ta zawk pawh a ni thei.

Dawt hmanga NLUP hlawhtlinpui an tarlan hi a dik lo. Kan politician-te kan rinna kan hloh belh nasa mai mai a ni. Thudik tak an sawi pawhin mipui hian dawt sawiah ngar ngar kan ngai tawh chung hian dawt dang an sawi belh leh a, mipui tan hian rin ngam an harsa tial tial a ni. TV-ah kuthnathawktute pual chhuah a ni ṭhin a, heng zingah hian NLUP avanga hlawhtling chu an tam vak lo, theihtawpa an beih tawh hnuah NLUP-in an kut a thleng ve chauh a ni zawk.

NLUP hi mi tam tak hian hlawhtlinpui pawh tum se, thil supply lamah a lem leh a chhia a tam ṭhin avangin hlawhtlinpui ngaihna a awm lo. Bawngpui ṭha leina daih reng pawisa dawn laia bawngpui chhia pahnih lei ngai tlat te, phun nun huphurhawm deuh mai thlai ṭiak te, a chi ṭha nia an sawi, chîn hnua a chhe chi lo ni leh si te, a tam mai. A policy hi ṭha mah se, mipuia thleng chin hi a chhiat miau chuan awmzia a awm lo. Kum rei loteah lo kan vât zui leh duai duai mai ang.

An ruahmannaah chuan NLUP ṭha chi a ni mai thei a, mipui kut, loneitute kut a thlen meuh chuan NLUP chhe chi a ni leh ringawt a. Bawngpui, hnute tui sawr tlak loh an dawn miau chuan sum hloha vulh reng aiin talh mai kha a hlawk zawk a, thlai ṭiak leh a chi chhia dawn miau chuan NLUP suma TV leh scooty lei mai khan a dawngtute mipuite hian kan hlawkpui zawk.

- Lalthununa Lawitlang