Kan senior san thei dawn em ni?
Zirna inah “ani chu a senior tawh a, a zirtir ṭha peih vak tawh lova” tih an sawi ṭhin. Nidangah chuan ka hrethiam mai a, ngaihtuah pawh ka ngaihtuah zui ngai meuh lo. Kum a lo vei a, zirna sang kan pan zel a; senior inti a zirtir ṭha peih tawh lo te zirtirna chu kan lo tuar reng mai.
Kum tin zirlai chi hrang hrang, mamawh inang reng sikulah an lo kalkhawm ṭhin a, chu an thil mamawh chu thiamna a ni. Kan lo senior san chuan an mamawh ang chu engtin nge kan pek theih ang? Zirlai tam tak kan dem fo, "thiamna tak tak nei lo" tiin, mahse a ṭhen laiah hi chuan an zirtirna dawn hi kan ngaihtuah let pui lo
ṭhin ve bawk a ni. Zirlai chu zirtirtuin a kaihruai tur a ni a, mahse zirlaite zirtir ṭha peih lo kan awm ta nawk mai.
Kan hun chhung hi kan tan a hahthlak ta lua deuh em ni? Nge zirtirnaah hian kan tui lo? CCA kan tih hi naupang zirnaa kaihruaitu atan a pawimawh. Engtinnge tuina nei miah lo hian zirtirna kan pek theih zawk? Zirtirtu mawhphurhna hi a san nen hian kan va chawi nung zo lo ṭhin em aw!
Dan zawm tur chi hrang hrang zinga pakhat - Sikul huam chhunga meizial zuk loh tur tihte chu zawm harsa kan ti khawp mai! Naupangte chu meizial zuk tur kan leitir zawk a, hetiangte chuan engtin nge dan ngaipawimawh tura kan zirtirnate hian awmzia a nei theih ang? Mahni zahawmna kan humhimin zah tlakin kan awm tur a ni ang.
Zirtirtu chu a hlauh-awm tur a ni lo a, a zahawm mai tur a ni. Nelson Mandela chuan "Zirna hi khawvela danglamna thlen thei tur atana hmanraw pawimawh ber a ni" a ti hial a ni.
Zirtirtute zawng zawng an ni e ka ti lo; ṭha tak takte pawh an awm. Zirtirtu ṭhenkhat, kum upa tawh tak chunga tui em ema la zirtir thei leh ṭhangthar awmdan zela inchhiar zau peih an awm bawk. Mahni hun leh tha senga naupang hnufual bikte
ṭanpui a, thiamthei ngai lo pawhin thiamna an lo neih phahna te leh entawn tlaka mahni in thunun thei te hian an hna an va tlin tehlul em!
Hetianga mahni dinhmun leh mawh-phurhna hre chianga zirna pe ṭhin ni thei vek ila chuan ṭhangtharte nun dan thleng te pawh hian hma a sawn ngei ang.
Theihtawp chhuaha zirtir chuan naupang tan pawh theihtawp chhuah duhna anmahniah a lo bet ve mai zel. Zirtirtu leh naupang thawhhona ṭha nei chuan result lawmawm tak leh thiam-na tak tak a pe chhuak a, naupang mai ni lovin zirtirtu pawhin hlawkna tam tak a chhar chhuah phah ṭhin. Hawh u, kan ram hmasawnna tan liau liau i ṭang thar leh teh ang u.
Zirtirtu sawisel ngaiah nge fak phu te zingah i awm dawn? tih zawhna nen hian hei chu ka duhtawk ang e.