Sumo Stand khawpui daifema sawn

Kan ram hruaitute hmalakna reng reng hian Aizawl khawpui chauh an ngaihtuah emaw tih mai tur a ni. Thingtlang lam dinhmun an thlir pha ve ṭhin lo niin a lang.

Phai ram mihring leh motor tam lutuk­na ramah pawh an Municipal Council-te chuan mirethei leh harsa zawkte dinhmun ngaihtuah ranin hma an la ṭhin.

Sikul ṭan hun mah zing lam dar 8 ah kan sawn hma thei a nih chuan, sumo chhuah hun hi zing dar 5:30 aṭanga dar 6:00 a.m. ah hunbi fel tak siam se, passenger tan pawh zawm a harsa lo ang a, traffic jam a awm phah hek lo ang.

Damlohna vang leh chakkhai lam turin thingtlang aṭangin neihlung khawngin Aizawl an rawn pan ve a. Tunlai thil man sang zelah Sumo chuan man leh Hotel chaw eina man thlengin a to tawh em em a, Aizawl cham chhungin sum hmanna tur hlir a ni bawk.

Chumi hnuah mahni thlenna veng aṭanga khawpui daifem ‘Sumo Coun­ter’ panna turin Taxi fare-ah sum tam tak sen zui a ngai dawn a, an harsatna hi a thuah hnih takzet a ni.

Temple Square, Millennium Centre kawt, Ramhun ‘N’, Bawngkawn Sairang road leh Zarkawt aṭanga zing dar 6 vela chhuah fel mai hian eng harsatna mah a thlen lo ang. Sumo stand sawn hrim hrim ai chuan a chhuah hun ‘timing’ fel taka siam a pawi­mawh zawk.

AMC pawh hian thingtlang mite leh rethei zawkte harsatna siam belh lo zawng hian khaw­pui faina leh thianghlimna kawngah te, kawng chep lutuk zauh hna te, luikawr ṭawp lutuk then fai hna te, lei min thei mai tur venna lamah te hian hmalakna chak leh zualin kalpui se tih chu mitin duhthusam a ni ngei ang.

Thawk leh khatah hmasawnna hi a lo thleng zung zung thei lo. India ram state tam takah pawh retheite chhan­chhuahna beihpui sawrkarin a thlak nasa hle. Muang fan raih leh a tahtawl te tein, awmze nei zawkin kan sawrkar hian retheite leirem rah vena turin hma la ve tawh se.

Narendra Modi leh Arvind Kejriwal ten ram hruai an tum dan leh duh dan nen chuan kan sawrkar kalphung hi chu a inpersan deuh a ni.

Sawrkar hian mirethei zawk leh thingtlang mite dinhmun ngaihtuah chung zelin, Sumo Stand hi khawpui daifema sawn hla kher lovin, a chhuah hun hi sawn hmain tidanglam deuh thei se a lawmawm ngawt ang.