Mahni ngûm khâk hmu duh lo, Mi ngûm khâk hmu thei viau si!
Tun hnaiah Congress Party-in an Communication Dept. lama Secretary Pu H Lawmsangzuala hminga Press Release an siam kha social media-ah ka lo hmu ve a, TV chanchin thar leh chanchinbu lamahte ka hmu bawk. Press Release-a an sawi ber chu ZPM sawrkar hnuaia kawngpui chhiatzia leh siam ṭha tura sawrkar an phutna a ni.
Congress Press Release-ah hian "Party dangten sokarna an chan laiin a bik takin Aizawl khawpui chhunga kan kawngpuite hi a chhe ngai lo," an ti hial a! An va zak lo mai mai tak ka ti rilru. Ka rilru chuan, 'Mahni inhriat chian hi a lo va har em! Mahni ṭhat lohna hmu thei si lovin, mi ṭhat lohna lai erawh chu kan hmu zung zung mai si a. Mi mita khanchhuk kan ngaimawh a, kan mita khanchhuk kan ngaimawh duh leh si lo' a ti a!
Congress Party-in sawrkarna an chan laia Mizoram hmun hrang hranga kawngpui chhiat em em zia kha mi tam takin kan la hria ang a, kan la mitthla thei ang. Zoram kil tinah khawtlangin hnatlangin kawng chhia an siam sup sup mai a nih kha. MNF Party phei chuan Champhai khawpuia kawngpui diakah buh an phun hial a ni. National Highway-ahte pawh truck a let hêt hût hlawm ṭhin bawk. Mi tam takin kan la hria a, kan la mitthla thei e.
Kawngpui chungchang bikah hi chuan MNF sawrkar kha Congress sawrkar ai chuan an zia deuh. Chuti chung chuan MNF sawrkar lai pawhin hmun tam takah kawng chhe lutuk, motor chi hrang hrang tana tlan harsa khawpa chhia a tam. Hmun ṭhenkhatah chuan lirthei pawlte'n an motor-te tlantir phal loa an dintir tawpte pawh a awm ṭhin. Congress hun lai a ni emaw, MNF hun lai a ni emaw, ka sawi hi a dik leh dik loh in finfiah duh chuan Youtube-ah zawng ru, kawng chhe video hmuh tur a tam lutuk tlat.
Congress sawrkar laia nasa taka kil tin maia kawngpui chhia avang khan Congress party hian kawngpui chhiate chu siam ṭha turin khatih laia an Party kaihhruai sawrkar kha chhete tal pawhin an nawr ve em? Congress hoin Press Release meuh siama kawng chhe chungchanga sawrkar ding lai an han bauh ve hi chu e... an zakthei lo hi ka tia lawm! Mahni ngûm khâk hmu duh lo a, mi ngûm khâk chauh hmu thei dik tak an ni.
Zêp thu a cheng lo, tunah hian Aizawl khawpui chhung hmun tin maiah leh kar kawng hrang hrangte namenlovin a chhe mek a, mipui an phun nasa pawh hi a awm reng a ni. ZPM sawrkar hi ṭang rawh se, sawrkar kal tawhte hun laia kawngpui chhe ve tho hmanga insawifiah mai lo leh thiam inchantir mai lovin, hma la vat rawh se.
Tunah hian ruah a la sur ṭhin a, kawngpui siam dan tur pangngai ang takin a siam theih rih loh tih chu hriat sa a ni. Chuti chung chuan, a nih dan tur ang taka a la siam theih loh chungin kawng khuar chhe zual laite hi chu a hnawh mâm theih tur a ni.
ZPM Party-te leh sawrkar hotute u, insawifiah ringawt lovin, ṭang teh u. MNF leh Congress sawrkar aia ṭha zawk sawrkar siam tum in ni a, anni lakah aiin in lakah mipui beisei a sang zawk a nia.
- L Zikpuia