Gas Customer-te tana hriat tur pawimawh
1. Ni 1.7.2016 aṭang khan Bank leh Gas Agency a Aadhaar number (xerox copy) thehlut/ link lote chu Bank account-ah gas leina subsidy pawisa a lut tawh lo.
2. Ni 30.9.2016 hmain Aadhaar number hi Bank leh Gas Agency-ah thehluh tur a ni. He mi hun chhunga Aadhaar number kan thehlut/ link a nih chuan ni 1.7.2016 - 30.9.2016 chhunga gas kan leina subsidy pawisa lut rih lo mahse a hnuah lut leh tura ngaih a ni.
3. Ni 1.10.2016 hmaa Aadhaar number Bank leh Gas Agency a theh lut lo chu an gas leina subsidy pawisa a lut lo ang.
BTC hi eng nge?: Kan hriat angin 2014 kum tawp lam aṭang khan kan Bank account number Gas Agency-ah thehlutin kum 2015 April thla aṭangin man to zawkin gas kan lei a, kan bank account-ah subsidy pawisa a lut ṭhin a nih kha. Kan bank account leh gas card number te a inzawm/ link-in BTC (Bank Transfer Compliant) customer kan lo ni ta a. Nimahse, ni 1.7.2016 aṭang kha chuan BTC customer kan nih khan subsidy a lut thei ta lo a, CTC customer kan nih a ngai dawn a ni.
CTC hi eng nge?: BTC customer kan nih hnuah Aadhar number chu Bank leh Gas Agency a kan thehluh leh a ngai a. Chumi hnuah CTC (Cash Transfer Compliant) customer kan ni thei dawn. Ni 1.7.2016 aṭang CTC customer te chauh gas leina subsidy pawisa an bank account-ah a lut thei.
LPG (Gas) customer-te tih tur: Central sawrkar, Petroleum & Natural Gas Ministry thuchhuak angin kum 2016 July thla aṭang chuan CTC Customer-te chauhin gas subsidy bank account-ah an hmuh theih dawn avangin kan Aadhar number chu bank leh gas agency-ah kan theh luh a ngai. CTC Customer ni thei turin Gas Agency-a Bank Account kan theh luh ringawt chu a tawk ta lo a, bank leh gas agency-ah kan theh luh ve ve a ngai. Kan theh luh a, bank leh gas agency-in an chin fel vek hnuah chauh CTC Customer kan ni thei ang.
CTC Customer ni tur hian kan Aadhaar Card te Bank leh Gas Agency-ah thehluh vat tur a ni. Thil buai tak niin lang mahse Aadhaar card nei sa tan chuan thil harsa a awm lo. He hriattirna hi Gas Agency-te pawhin ni 6.7.2016 khan an dawn chauh avangin mipuite hnenah pawh puanzar lawk hman a ni lo.
Supreme Court thu-chhuakah chuan Aadhar Card neih hi miin a duh leh duh loha thu a ni tih a nih laiin a pawimawh deuh deuh dawn niin a lang. Mizoram sawrkarin Aadhar Card siam tura a rawihte pawh tunah chuan an chawlh mek avangin tifel thuai turin mipui lamin harsatna kan tawk deuhin a rinawm (RD Block hrang hranga khawihtute chu an chawl mek). Tun dinhmunah Gas Agency ten BTC Customer tlem te te an neih ho te hi a tlangpuiin sipai leh pensioner an ni. Mipui nawlpui chuan Aadhaar card hi Bank leh Gas Agency-ah kan la theh lut lo a, Gas Agency a theh lut tawhte pawhin Bank lamah theh luh ve leh a ngai a ni tih hriat a
ṭha. Tin, Aadhaar card, Ration card, Bank account etc. ah te kan hming ziah dan inang lo a awm nual. Hetianga hming ziah dan inang lo kan nih chuan tih dik dan kan zawn vat a pawimawh.
Mizote hi ngaihsam tak kan nih avangin harsatna kan tawh phah fo a, thuneitute leh midang kan puhmawh mai loh nan keimahni lam kan in chinfel phawt a pawimawh awm e.
- P.C. Ramchullova, Darlawn