Mamit kawng leh Lei chim
Mizoram khaw-thlang, Tlawng thlang-lam, Mamit District hi Zoram hmun dang angin kan bengchheng lo niin a lang. Hman deuha Lunglei Hrangchalkawn vel kawng chhe lutuk thawm nat dan te, Cham-phai khawchhung kawng chhe lutuk kawnglaia leilet buh an phun te, Bilkhawthlir vel kawng chhia, a vel mipui thawm nat dante han ngaih-tuah chuan an ngawi thei zawk mang e.
Heti taka Aizawl leh Mamit inkar kawng chhia ni mai lova, a kal pawhna lei pawi-mawh, Sihhmui bula Tlawng lei chim chhen te, Bairabi bul Tlawng lei, kum tam tak chhung dawh hna an thawh tawh, zawha hma hauha a chim mai te, Mamit District pumin kan tawrh dan pawh kan la auchhuahpui ngai lo a ni. Ka hriatsual loh chuan, Sihhmui bul Tlawng lei a chhiat vanga Buichali lei lama kal a nih hian, Airport kal turin Taxi chuan man Rs. 200/- velin a san phah an ti.
Tlawng lui kan ngai khua zawng zawng, Mamit, Phaileng, Tuipuibari etc. kal tur chuan hei hi kan tuar vek. Mamit khawpui leh a chhehvel tan chuan thinrim thlak tak a ni.
Heng Tlawng kantu lei kan sawi pahnih hian Meghalaya rama Sonapur lei pawh a tiat lova, Cachar-a Tlawngin Tuiruang a fin dawn ṭepa Tlawng kantu lei pawh a tiat lo. Heng lei hi tuna Mizoram chhunga Tlawng lei kan sawi pahnih dawh hna an thawh ang em ema rei hian an thawh chhung kha a rei lovin ka hria. Hetiang em ema muanga he hna hi kalpui a nih loh nan State Sorkar hian hma a la tawk lo niin a lang a, a tuartu mipui pawh hi kan phun lungawi mai ṭhin niin a lang. Kan bialtu MLA mai ni lo, Minister zahawm tak ni bawk te pawh hian an ngaihsak lo nge, an tha tichak turi bial mipuite’n kan thlawp tawk lo aw ka ti.
Tuna Multimodal Transport Road (ti mai ila) an laih mek lah hian kum tin fur laiin kal hleih theih lovin kawng a siam a. An kawng laih thar hi zawh theih a nih hma chuan kawng hlui hi zawh theih turin an maintain tur a ni tih agreement a awm e an ti a; agreement chu an zawm lo chiang kher mai. Kumin 2016 pawh hian April ruahtui tlak aṭang khan Car leh Two-Wheeler tan kal ngam pawh a ni lo, ruahtui min tihbuai chhung September thla thleng chu he kawng hi a zawh ngam dawn loh a nih hmel a, Car leh Two-Wheeler-in a zawh hleih theih loh lamlian, State Highway hi Mizoram hmun dangah a awm ve lo a nia.
Aizawl leh Mamit inkar kawng te, Kolasib to Mamit via Bairabi te hi State Highway an ni ve a, a District chhung leh a panna lamliana lei te zawh thei tur chin lirthei phur rit phurh rih zawng tuk a ni te hi mipui tan chuan phur rit lian tak a ni. Buhfai, Petrol, Gas, bungrua chi hrang hrang, balu, etc. a to phah bawk. Tuna kawng laih lai mek, Tut leh Mamit inkara hnuhma la lang miah lo te hi chak zawka hmalak nise kan ti khawp mai, motor lian load la pangngaiin Mamit kal tlanga a veivah theih hun hi kan nghakhlel a ni.
- Ropiangliana