Eng nge i tih?

Lehkha kan zir lai in kan ṭhianpa pakhat chuan nakinah chuan "Eng nge i tih?" tih hi in zawhna in dawn tam ber tur chu a la ni dawn a ti ṭhin. A sawi hunlai kha chuan kan ngaithla liam mai a, mahse kum a ral leh meuh chuan kan zawhna dawn tam ber chu "Eng nge i tih?, Enge i thawh tak?," tih chu a ni ta ngei mai.

A lo sawi dik khawp mai. Thawh­ṭan­niah class kal turin kan chhuak a, a tukah pawh kan kal leh dawn tih kan hre lawk, a kar leh thla leh thleng pawh in class kal bak ngaihtuah thui a har ṭhin. Mahse, Master degree zawh hunah thawh tur hre lo a han hawi lawl lawl hnu chuan class kal lai kha a lo ngaihawm ṭhin mang e.

Han thawh tur duh bik nei, mahni duh ang hmu thei si lo, hmuh ang thawk hreh bawk si, chhungte laka inthahrun awm tawh bawk nen lu hi a hai mup mai ṭhin. Naktukah eng nge ka tih ang? karlehah eng nge ka thawh ang? tireng rengin kan in ngaihtuah buai nitin mai a ni.

Ka'n ngaihtuah let hian kan pi leh pu ten 'A hniak tam lam lam' an lo tih ṭhin kha a dik ber lo ni hian ka hre ta. =hiante zir ang, mipui vantlang in an zir ang ang lo zir ve ngawt kha a fuh ber lo a ni tih chu a takin kan tawng chho mek a ni. Kan ṭhian kawm ngeih ten an sawi mawi avang ringawt leh vawikhat mark kan score sanna a nih vang ngawt a zir luih tum ṭalh hi a lo fuh ber lo chiang hle.

Kum tinin lehkha­thiam (Mithiam an ni vek lo) an pung thur thur a, mahse, sorkar hna a pung chak ve chuang si lo. Sorkar hna awmchhunah lah hmelhriat ṭha nei lo tam beisei san ngam chi a ni bawk si lo. Hnathawh tur leh tum mumal nei lova lehkha lo zir mawl tawp a pawi zia chu hrilh nawn ngai lo in kan hre chiang tulh tulh a ni ber mai.

Mizote hi midang ngaihdan tur ngaichang leh midang tih dan entawn ching tak kan ni. He mizia hi kan la kalsan thei rih lo, kan ṭhatpui nge kan chhiat pui tih chu chhut fe tham a ni tawh. Tunlai a Zoramin a buaipui ber pakhat chu ṭhalai hna nei lo leh hna thawk peih lo ho kan ni.

He kan harsat na hi tuman min sut kian sak dawn lo a, kei mahni in kan sut kian a ṭul. Mahni thiamna leh theihna in a tlin tawk thawk hreh lo ila. Thiam fal bik kan nei a nih ngawt loh chuan eng hna pawh kan thawh hreh loh a ṭul. Han thawh duh bik neih a tawh theih si loh ai chuan mahni phak tawk thawh ngam a hun ta. Dinhmun sang ṭha tak aṭanga bul ṭan hi mi zawng zawng tih theih a ni loh avangin a ler thleng tur chuan a bul ṭhut a kan ṭan ngam a ngai a ni.