I polite tlang zel ang u aw

Kan Aizawl khawpui chêp tak karah lirthei a pung nasa a, kawngin min daih ngang tawh si lo. Tuna polite taka lirthei kan khalh ang hian polite tak zelin khalh ila, state dang khawpuiin an tih ve theih loh hmehrîk (motor horn) khap pawh ni loa kan han hmet ri lo ringawt pawh hi a zahawm a, a mawi em em a ni. I ching zawm zel ang u.

Kawng zim tak karah lirthei ke pali nei an tlan a, a sir ding lamah ke hnih nei an inzui thliai thliai a, tu mah intlan pêl fua fua an awm meuh lo. A hma lama ding an awm chuan an hnungah an rawn ding ve zel a, a tâwk zawnga lirthei tlan zar zar theihna turin kawng kan lo kiante hi a va mawiin a va hmuhnawm tak em!

Hetih lai hian, lirthei khalhtu ṭhenkhat mi tlemtê, mahni hmaa mite rem leh rem loa tlan pelh tum phêt an la awm cheu mai. A bikin tww wheeler taxi khalhtu zingah an hmaa mite veilama tlan pelin a kar âwl zeuhah a hmaah an lut leh ṭhin. Hetiang hi Lammual aṭanga Bazar Bungkawn inkar, chhim lam pana tlan zingah a hluar zual viau mai.

Hetianga two wheeler tlanna lane-a mi dangte anga inlar ve mai lo a, mi kara lut zeuh zeuh ching hi a tlangpuiin lirthei khalh thiam ve si, thingtlang aṭanga two wheeler taxi khalh an ni e, an ti ṭhin. Dik tak ang maw?

Two wheeler khalhtu tam zawk ṭha taka an intlar thliai thliai laia 'a changtupa' ni awm taka rawn pêl leh fua ṭhin mi tlemtête hi miin mâwl an ti duh khawp mai. Han inngaihtuah chiang teh ka unau, i mâwl ve nulh ṭhin em le?

He lai hmunah hian traffic police pathum vel duty thei se, dan bawhchhiaa hmaa mite vei lama tlân pelh chingte chu man hmak hmak se. Na taka hrem pawh an ngai lo ang; thu ṭha takin hrilhfiah se, an sim em em ang. Mizo chu tih nuam tak kan la ni a, ṭha tak leh zahawm taka min hrilhfiah chuan kan zawm em em ang. Chutiang tur chuan traffic police hotute pawh hian hria se a duhawm khawp mai.

Aizawl khawpuiah Smart City Project kalpui zingah CCTV ṭha chi vuah a ni a, camera pawh a ṭha ngiang mai. Hengte hi traffic police lam pawhin hmang ṭangkaiin, hnu chhui nan hei ai hian uar leh zual thei se, khawpui chenna nuam takah kan siam zel thei dawn a ni.

- Melissa Pa