Ration card ennawn mek hi

Food, Supplies & Consumers Affairs department chuan tunlai hian ration card a ennawn mek. Khua leh veng tinah card var, card pawl leh card eng nei thei chin bithliah thar mek a ni a, hei hian kawngro su tak tura ngaih a ni.

Ration card hi tun hma deuh chuan village council leh local council-te’n an party induhsak nan an hmang ṭhin niin an sawi a, dikna chin pawh a awm ang. Card pawl emaw, a eng (yellow) emaw nei lo tur khawpa hausa leh sorkar hnathawk awmna chhungkuate’n an nei fur mai hi a dik lo.

Central sorkarin mirethei, mahni inchâwm zo mang lote tana a siam liau liau ration card pawl leh a eng hi veng hruaitute zawh chian chuan, "Mihringin an daih lo a, a la chuang tam a, kan pe ve mai a ni," an tih thawm ka hria a. Chuang eng ang mah se, a dawng tur dik tak bak pek loh tura ngaih a ni. Pek let leh mai kha a mawi em em a ni.

Tuna Supply department hmalakna hi a ṭha viau. Mirethei bak berh chan tur sumdawng hausa leh sorkar hnathawkte’n an han ei ve ngawt a, ration card an neih loh tawp tur an nei hi chhui chhuah vek sorkarin a tum hi a lawmawm ngawt mai.

Hmân kum khan ka nau (cousin) ration card hmangin mi harsa zawkte pek tur buhfai lak ka tum a, anni khan ration buhfai an lo la ngai reng reng lo hi a lo ni a. An card lah chu rethei zawkte chan tur ang chi a pawl a lo ni a, man loin ka la ta ṭeuh mai a. Card ka pek let leh chuan ka sawi a, an zak khawp mai a. Engtia card var nei tur card pawl an lo neih daih ni, a chhan an hre lo reng reng a, a rang a rangin an thlaktir leh ta a ni.

Tunlai hian veng hrang hrangah card endik hna thawh mek a ni. Supply Minister-in a sawi angina, khua leh veng tinah tar chhuah tur a ni a, veng chhung chanchinbuah pawh chhuah tur ni awm tak a ni. Hei hi a thlawpawm tak zet.

Hetianga langtlang taka kalpui a nih a, a buaipuitute’n dik taka an tih bawk phawt chuan thil fel lo tam tak siamṭhat a nih ngei a rinawm a. Sorkar sum pawh eng emaw zat chu hum theih a ni ngei ang. Dik taka tih hian thil ṭha a chhuak mai ṭhin.

ZPM sorkar hian hma han la tak tak teh se. Thil fel lo tam tak hi kan ramah a tam lutuk hi a ṭha lo. MNF emaw, Congress emaw sorkar thil tih dik loh a ni vek lo tih chu mi zawng zawngin kan hre ngeiin a rinawm. LC/VC-te dik loh a tam khawp ang.

Hetiang thilah hian YMA hi hman ṭangkai thiam a pawimawh khawp mai. Political party hi zawng kan ring vek ta lo deuh chu a ni e.

- Lal Rinmawia