Mizoram football hmasawn nana artificial grass phah

Mizo ṭhalaite infiamna lama kan tuihâlna hi kan hun hma lam daih tawhah khan a lian em em a, a bik takin football ground ṭha kha a ni zual a; vawiin ni thlengin a la ni zel. Kum 2003-a Mizoramin national football tournament U-16 kan thlen ṭum phei kha chuan kha tih laia Chief Minister Pu Zoramthanga khualliana Lammuala a kal pawh ṭhalai hovin ‘Khelmual ṭha, khelmual ṭha’ tiin an au khum a nih kha. Ani khan khelmual ṭha tak pek a han tiam a, kut an beng dur dur a. Mahse, a hun tawp thleng khan engmah tih zui kha a awm ta lo.

Kum 2008 December thlaah Congress-in sawrkarna kan han chang a. Sports department enkawl tura min tih hlim hlawl khan MFA hotu Pu Tuikhuahthanga leh Pu Vanlalngheta te ka inah lo lengin, khelmual ṭha neih theih dan tur kan sawiho a. Grass ṭha a awm loh chuan hmasawn a har, ground chhe deuhah kan naute an practice a, phaiah ground ṭhaah mi chuan an zir a, hmasawn turin kan naute’n ground ṭhaah an zir ve a ngai a ni an rawn ti a. Kan ram sik leh sa ngaihtuahin fûrah ruahtui tam lutuk avangin kan ground kan dai kawi vek a, ṭhâlah kan pal khu leh rum rum a. Chuvangin, artificial ground lam hawi mai ila kan ti ta a ni. Anni pawh chu internet lama hetiang siam theite dap turin ka hrilh a.

Kum 2009 kum thar veleh khan an lo kal leh a. India ramah artificial ground siam thei company pakhat chauh an hmuh thu leh ground pawh pakhat chauh a la awm thu an rawn thlen leh a; ngaihtuah zui turin kan dah a. Thil thar tur a ni a, tihsual pawh kan hlau. India rama artificial ground an siam chhun lah chu Goa lamah daih mai a lo ni a; en loh chuan ka ti ngam mai lo. Hemi hnu lawk hian IT department lamah Goa zinna remchang a lo awm ta hlauh mai a, Pu TKa nen chuan grass en pah turin kan zuk zin ta a ni.

Goa-ah hian 14th February, 2009-ah ground siamtu company-te kovin kan en a. Keimahni ngawta thutlukna siam lovin Robert Lalthlamuana, khawzawl football player, Churchill Brothers, Goa-a khel mek chu kan ko bawk a. A hnenah chuan, “Hetiang ground hi Mizoramah siam ve kan duh a, inkhelhna atan hian a ṭha ngei em?” tiin kan zawt a ni. Roberta chuan ṭha a tih thu sawiin, Mizoramah chuan hetiang bak hi chu a harsa rih ang a ti ve bawk.

Kan haw a, sawrkarah sum a awm mai loh avangin kan ti mai thei lo a. Kum 2011-ah Aizawl Lammualah artificial turf Mizorama hmasa ber chu kan phah thei ta a ni. Mipui pawhin an lawm hle a nih kha. A kum leh 2012-ah Lungleia Ṭhuamluaia Mualah kan phah zui leh a. Chu bakah, North East Games-a hman hman turin Rajiv Gandhi Stadium, Mualpuiah kan phah leh zui ta a ni. Chutiang chuan ka hun laiin Champhai Chhangphut Field leh Champhai Zotlang Field-ah te, Kolasib-ahte kan phah zui thei ta a.

Mizoram Football Association nen kan thawhhona a ṭha a, kan grass phah chuan awmzia a nei hle bawk. Kum 2014-ah semi final pawh kan la thlen ngai lohna, India ram state-te inelna sang ber Santosh Trophy-ah kan champion ta ruau mai a. Vawiin ni thlenga kan la champion zui leh lo erawh rilru a na deuh.

Mahse, Santosh Trophy kan champion aṭang khan kan state player-te vai ram lamin an rawn hmelhriat ṭan ta tak tak a. Kan tlangvalte phai ram club ṭhaah hlawh tam tak tak neiin an khel zui ta huai huai mai a ni hi. Vawiin ni thlengin India team foreign-a an zin chuan Mizo tlangval hmel hmuh tur an awm ta zel maite hi hmuh leh hriat a nuam ngei mai. Vawiin nia football vanga lar Jeje Lalpekhlua MLA hial a han ni chho ta te, India ram player ṭha ber (Player of the Year) atana Lunglei tlangval Lallianzuala Chhangte a rawn ni chhote hi lawmawm ka ti tak zet.

State rethei kan ni a, infrastructure neih ṭhatah mi state phak lo mah ila, kan ṭhalaite tumruhna te, an huaisennate leh theihna hian Mizoram hi a la chawi sang zel ang tih ka beisei tlat a ni.

- Zodintluanga