Doctor-te leh an sum lakluh hi

Mizo zingah tun­hma chuan engi­neer nih a hlawk a, an in zir hmuh luai luai a; tunah chuan doctor nih a hlawk an ti leh a, an in zir hmuh leh suau suau a, doctor ṭha tak tak leh fel tak tak kan ngah ta hle mai. Ka ṭhianpa pakhat chuan doctor hausak dan tur zia hi, a ti ngawt pek a.

Kan doctor thiam thiam hi a tam zawk chu sorkara thawk an ni a, specialist chin ngat chuan an sorkar hna bakah private clinic nei lo sawi tur an awm meuh lo. Zing leh tlai an hun awl kara an sum lakluh hi turu tak a ni a, an hausa em em hlawm bawk. An thawh dan en chuan hausa awm tak pawh an ni ang.

Aizawlah chuan kan doctor thiam thiam hi Aizawl civil hospital-a an chhuarvawr an ni a, heng ho hian an hna bakah theihtawpin pawn lamah damlo an la enkawl nasa hle a ni.

Private hospital nena inthlunzawm an ni deuh vek a, civil hospital-a admit sen loh chu an thlunzawm hospital-ah awlsam takin an admit a, zai ngai a nih pawhin nghah rei ngai loin an zai thei vek bawk.

Doctor-te hausak zia ringawt en erawh chuan an itsik awm ve fu mai. Mahse direct taka mihring tana thawk an ni a, sawisel ngam chi pawh an ni lo. Sorkar hnuaia thawk pawh an hunbi thliah a tawp chinah private hospital-ah an damlo enkawlte an tlawh leh a, chumi zawhah private clinic an nei leh a, damlo 40/50 lai an en hman ṭhin a ni.

Heng doctor thiam tak takte hi sorkar hna an thawh bak pawn lam­ah thawk lo tura khuahkirh ni ta se a tuar tur chu mipui kan ni. Hospital-ah nitin damlo 50-100 aia tlem lo an en a, zai thiam phei chuan mi 10-20 aia tlem lo zai chang an nei a, hospital aia private clinic-a in entir duh kan la tam zawk leh nghal a. Chutiang chu an nih vangin an hunawl neih zawng zawng damlo tan an seng a, hausa pawh ni sek sek se eiru-a hausa an ni lo tih chu ka zir ve dan a ni.

Aizawl civil hos­pital-a thuneitute pawhin an hnuaia doctor thiam tak takte chu an khuah­khirh nasa ve hle tih pawh hriat a ni a, damdawiina an hun hman dan pawh an lo invil nasa hle mai. A thu hrimah civil hospital-ah ringawt damlo enkawl dawn se thil theih a ni tawh lo a, chuvangin private hospital-a thawh leh private clinic an neih hi mipui tan chuan hlu tak a ni.

Chuvangin, doc­tor hausa tak takte pawh eiruka hausa ni loin mipui tana an thawh rah vanga hausa an ni e. Theihtawp chhuah zel teh se.